Governu Hapara Ona Serka Sanitária Iha RAEOA, Munisípiu 4 Kontinua

Smnewstl.com 08-09-2021 (Dili) — Governu liu husi reuniaun konsellu ministru, deside hakotu ona impozisaun serka sanitaria iha suku Suku Naimeko sub-rejiau Parte Makassar no suku Bobometo sub-rejiaun Oesilo Rejiaun Administrativa Espesiál Oe-cusse Ambenu (RAEOA) to’o tuku 23:59, husi loron 8 fulan-setembru tinan 2021.

Maibé impozisaun serka sanitaria bá munisípiu 4 hanesan, Dili, Manufahi, Covalima no Ermera sei kontinua nafatin too’o loron 22 fulan Setembru tinan 2021.

“Governu deside atu impoin nafatin serka sanitátiu iha munisípiu Baucau ho Covalima, Dili Ermera to’o dia 22 fulan Setembru 2021, serka sanitaria regra ne’ebé mak kontrola entrada saída bá iha munisípiu ka iha zona administrativa ida husi ita-nia territóriu nasionál. Governu mós deside halo para ona serka sanitaria iha RAEOA liu-liu iha suku Bobometo no suku Naimeko, serka sanitaria ne’e sei hotu orsida kalan la extende,” dehan Ministru Fidelis Kuarta ohin, iha ministériu finansas.

Kona-ba serka sanitaria iha munisípiu Manufahi, Fidelis Magalhães esplika, bainhira laiha ona situasaun extra-ordináriu ruma akontese, maka iha loron 15 fulan Setembru ne’e, governu bele hapara ona.

“Konsellu ministru mós husik hela serka sanitaria iha munisípiu Manufahi to’o nia remata iha dia 15 fulan Setembru 2021, sé bu’at hotu la’o normal hanesan agora, hafoin dia 15 laiha nesessidade ruma urjente atu halo renovasaun, a não ser sé situasaun ne’e agravas derepente iha Manifahi, entaun ita tenki haree fali situasaun ida-ne’e,” subliña nia.

Maibé Governante ne’e husu bápopulasaun sira-ne’ebé mak seidauk vasina, bele hakat bá sentru vasina atu bele hetan imunizasaun kontra virus corona ho variante Delta, tanba vasina mak nu’udar dalan úniku hodi proteje aan husi Covid-19 ho nia variante sira.

Ho serka sanitaria ne’e, bandu nafatin tama no sai husi munisípiu Baukau, Kovalima, Dili, Ermera no Manufahi, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

Proibisaun ida-ne’e la abranje ba indivídu sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompaña indivíduu sira ne’e.(ant)