Governu Halo Análize Bá Dezafius Implemetasaun Programa Sira Iha Pos Dezastre Naturais

Smnewstl.com (Dili) — Oitavu governu konstitusionál lideradu Primeiru-Ministru (PM), Taur Matan Ruak, realiza retiru ho membru governu sira hodi halo análize bá dezafius sira husi implemetasaun programa ne’ebé la’o hela iha pos dezastre naturais ne’ebé akontese iha loron 4 fulan-abríl foin lalais ne’e.

Ministru Prezidénsia Konsellu Ministru, Fidélis Magalhães esplika, objetivu prinsipál husi enkontru alargada koordenasaun entre membru governu sira atu fó solusaun bá problema no dezafius liu-liu iha pos inundasaun husi dezastre naturais foin lalais ne’e.

“Ninia pontu sira ne’ebé mak ohin diskuti iha reuniaun ida-ne’e mak kona-ba progressu implementasaun bá projetu sira konstrusaun pos 4 de Abríl 2021, progressu implementasaun apoiu umanitária bá pos 4 Abríl 2021 no suplementu remuneratóriu bá ekipa front line sira funsionáriu públiku sira,” dehan Ministru Fidélis Magalhães, hafoin remata enkontru retiru sesta (06/08/21) iha ministériu finansas.

Projetu rekonstrusa bá danus estragus sira husi dezastre naturais loron 4 fulan-abríl foin lalais ne’e kontinua la’o hela, tanba ne’e governu presiza halo koordenasaun, nune’e bele finaliza tuir tempu.

“Nia prosesu sira hotu tantu iha dezafius, maibé sei iha solusaun sira, tanba ida-ne’e mak iha progressu sira implementasaun konstrusaun nian, iha mekanízmu KAFI ne’ebé mak sei buka rezolve problema sira-ne’ebé mak mosu,” tenik nia.

“Nune’e mós iha implemetasaun apoiu umanitáriu nian, iha entidade sira hanesan Sekretáriu Estadu Protesaun Sivíl no mós Ministériu Administrasaun Estatal sira mak halo servisu iha área ida-ne’e,” sublima Fidélis.

Retiru refere, tuir planu, sei halo fulan ida dala ida, no posibilidade fulan ida dalarua, nune’e bele iha koordenasaun hodi buka solusaun bá dezafius sira-ne’ebé ezekutivu hasoru.(ant)