Governu Foin ‘Hakfodak’ Lori Sai Refujiádu Manleuana Bá Fatin Seguru, Antes Ne’e Homan A’an Iha Lona Okos

Smnewstl.com 13-11-2021 (Dili) – Ministru Administrasaun Estatal (MAE), Miguel Perreira de Carvalho orienta Autoridade Munisípiu Dili hodi muda refujiádu sira iha sentru akollimentu Manuleuana bá fatin kost ne’ebé governu kontrata ona.

Prezidente Autoridade Munisípiu Dili, Guilhermina Filomeno Saldanha Ribeiro hateten, hafoin udan horseik, Autoridade Munisípiu Dili, deside hasai uluk família 6 ne’ebé propriedade liu bá inan isin-rua, inan ho labarik, ferik no katuas la inklui labele sasán uma laran sofre be’e tama hotu.

Família 6 ne’e, Autoridade Munisípiu Dili evakua bá hela provizóriu iha kost mak hanesan Aldeia Lesibutak, uma-ka’in 2 no Aldeia Lemkari uma-ka’in 4.

Tuir Guilhemrina, Ministru Administrasaun Estatal orienta, iha etapa primeiru, sei hasai vítima sira iha sentru akollimentu Manuleuana bá fatin alojamentu, hafoin halo reidentifikasaun fila-fali tuir lista ne’ebé antes ne’e rekolla ona.

“Oras ne’e ami mai fila-fali tuir orientasaun señór Ministru katak, atu hasai hotu, depois mak reidentifika fila-fali tuir lista ne’ebé ami iha, tau sira iha kost-kost ne’ebé mak altura identifika ne’e mak ita bá tau sira provizóriu iha ne’ebá labele hetan fila-fali inundasaun hanesan horseik ne’e lona balun bee tama to’o iha laran,” dehan Prezidente Dili, Guilhermina Filomena Saldanha Ribeiro, iha sentru akollimentu Manuleuana, Dili, Domingu ne’e.

Guilhermina afirma, etapa daruak, Autoridade Munisípiu Dili sei evakua família uma-ka’in ne’ebé deside atu fila bá ida-idak nia Munisípiu.

“Sira-ne’ebé loron ida ami mai foti ona lista dehan atu bá Munisípiu ne’e ita bele dehan, ita bele dehan segunda etapa, tanba primeiru etapa agora oinsá atu proteje ita-nia deslokadu sira hela iha ne’e hamutuk 41 sai tiha ona 6 hela de’it ona 30 ital,” tenik nia.

Governu prevé ona orsamentu $ 200 mill hodi selu kost sira iha kapitál Dili, nune’e bele evakua deslokadus sira bá hela iha fatin mahon, nune’e evita labele hela iha bee laran.

Fatin hanesan, Reprezentante Koordenadór Refujiadu Manuleuana, Jónio da Cruz hateten, sira prontu atu sai husi sentru akollimentu bá kost, maibé, presiza iha koordenasaun ne’ebé di’ak.

“Ami bele kopera ho sira, maibé sira mós tenki kria lai enkontru ida ho ami, muda ami bá ne’e oinsá, karik aban bairua ami bá iha kost ne’e mak estuda dehan, ita-boot sira-nia osan atu halo bairu foun ne’e mak ami selu ona bá kost,” dehan Jónio.

Entretantu, totál família deslokadus sira iha sentru akollimentu Manuleuana hamutuk 41, no uma-ka’in 6 mak sai evakua ona bá fatin seguru, tan ne’e hela de’it ona uma-ka’in 35.(ant)