Governu aprova tetu agregadu OJE 2022 billaun $ 1.675, Foku bá Prioridade 6

Smnewstl.com 27-09-2021 (Dili) – Governu reuuniaun estraordináriu konsellu ministrus iha loron 24 fulan-setembru 2021, aprova ona tetu agregadu no desagregadu Orsamentu Jerál Estadu (OJE) tinan 2022 ho montante totál billaun $1,675 ne’ebé aprezenta husi Ministru Finansas, Rui Augusto Gomes.

Tuir komunikadu imprensa ne’ebé Smnewstl.com asesu husi ministériu finansas katak, tetu agregadu aprovadu ho montante billaun $1,675 sei uza hodi finansia programas 43 iha perímetru OJE tinan 2022 liu husi prioridade nasionál neen (6) mak hanesan.

Dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu (agrikultura no turizmu), ambiente no konektividade, dezenvolvimentu setór privadu no kooperativa.

Dezenvolvimentu Rurál no boa-governasaun ho objetivu atu atinji dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.

Alokasaun orsamentu 2022 tuir prioridades nasionál 6 aas liu mak iha Setór Produtivu sira (agrikultura no turizmu), Ambiente no Konektividade ho alokasaun 27%.

Tuir kedas ho abitasaun no inkluzaun sosiál 22%, boa governasaun 12%, dezenvolvimentu kapitál Umanu 10%, dezenvolvimentu rurál 3% no dezenvolvimentu setór privadu 0,5%. aleinde ne’e, ba funsionamentu mákina Estadu hetan alokasaun 18% no atividade seluk 8%.

Tuir-mai alokasaun orsamentu aprovadu ba OJE 2022 tuir klasifikasaun ekonómiku aas liu mak iha transférensia públika ho montante millaun $565,9.

Tuir kedas ho bens no servisus millaun $449,8. kapitál dezenvolvimentu ne’ebé bele kria kampu traballu no jere empregu rai-laran hetan alokasaun millaun $401,7. saláriu no vensimentu millaun $233 no kapitál Menór millaun $24,4.

Entretanntu, governu sei aprezenta proposta lei OJE 2022 bá Parlamentu Nasionál iha fulan outubru tinan 2021.

Nune’e ho aprovasaun konsellu kinistrus ne’e, ba oin ministériu finansas sei hahú prepara livru 1 to’o livru 6 husi proposta lei OJE 2022 inklui dokumentu adisionál sira ne’ebé no governu sei entrega bá Parlamentu Nasionál iha loron 15 fulan-outubro 2021.(ant)