Governu Aplika Hikas Serka Sanitária Bá Munisípiu Ermera, Dili Kontinua Extende

Smnewstl.com — Governu liu husi reuniaun konsellu ministru, aprova projetu rezolusaun rua hodi mantein impozisaun serka sanitária iha munisípiu Dili to’o oras 23:59 husi loron 12 fulan-augustu tinan 2021.

Nune’e mós, konsellu ministru deside impoin tan serka sanitária iha munisípiu Ermera entre oras 00:00 husi loron 29 fulan-jullu to’o oras 29:59 loron 12 fulan-augustu tinan 2021.

Ministru Prezidénsia Konsellu Ministru, Fidélis Magalhães hateten, governu deside aplika hikas impozisaun serka sanitária iha munisípiu Ermera durante semana rua, tanba númeru infetadu bá Covid-19 hasa’e makas.

“Hafoin rona aprezentasaun husi SIJK sala situasaun, konsellu ministru atu mantein serka sanitária iha munisípiu Dili to’o to’o oras 23:59 husi loron 12 fulan-augustu tinan 2021. Alem de ne’e, konsellu ministru deside mós atu impoin serka sanitária iha munisípiu Ermera to’o dia 12 fulan-augustu 2021,” dehan Ministru Fidélis Magalhães, kuarta (28/07/21) hafoin remata enkontru konsellu ministru iha Palásiu Governu.

Fidélis hatutan, aprovasaun serka sanitária bá munisípiu Ermera ne’e, SIJK sala situasaun mak husu, tanba haree bá númeru infesaun Covid-19 sa’e derepente de’it iha munisípiu refere.

“Tanba informasaun ne’ebé mak konsellu ministru simu, númeru infesaun derepente de’it sa’e makas iha Ermera, até iha reuniaun konsellu ministru hela, simu tan informasaun katak, númeru infesaun aumenta bá 123, horseik (Tersa) de’it iha 40 itál depois salta tiha, tanba ne’e mak sentru integradu husu konsellu ministru bele aprova serka sanitária bá iha munisípiu Ermera,” informa nia.

Governante ne’e esplika, serka sanitária la’ós hanesan konfinamentu obrigatóriu, tanba serka sanitária ne’e, atu izola de’it munisípiu ida, nune’e husu atu sidadaun sira kumpre nafatin regras saúde nian hanesan fase lima, uza máskara no seluk tan.

Impozisaun serka sanitária ne’e, bandu sirkulasaun ema nian entre munisípiu Dili no Ermera, no mós sirkunskrisaun administrativa sira seluk, maibé sei permite de’it nesesidade urjenti sira hanesan seguransa públika, saúde públika, asisténsia umanitária manutensaun bá abastesimentu públiku ne’ebé importante bá interese públiku nian.

Sorumutu konsellu ministru ne’e mós, halo aprovasaun bá medidas ezekusaun bá deklarasaun estadu emerjénsia, ne’ebé efetua husi dekretu Prezidente Repúblika n°.56/2021, loron 27 fulan-Jullu bá territóriu nasionál tomak hodi hatán bá pandemia Covid-19.

Estadu emerjénsia ne’ebé renova ona ne’e, sei abranje bá territóriu tomak ne’ebé sei vigora entre tuku 00:00, loron 1 fulan-augustu to’o tuku 23:59 loron 30 fulan-augustu tinan 2021.(ant)