Governo Deside Hakotu Serka Sanitária Iha Dili, Mai Husi Li’ur Tenki Aprezenta Rezultadu Teste Negativu

Smnewstl.com 29-09-2021 (Dili) – Konsellu ministru deside hakotu ona impozisaun serka sanitaria iha munisípiu Dili, maibé ema ne’ebé mai husi estranjeiru tenki hatudu rezultadu teste negativu bá Covid-19 no kompleta vasina dalarua bá pessoál saúde sira durante oras 48.

Medidas refere, governu introdús ona iha medidas ezekusaun estadu emerjénsia bá dala-18, hafoin rona tiha aprezentasaun husi ekipa husi Sala Situasaun Sentru Integradu Jestaun Krize (SIJK), ne’ebé efetua husi dekretu Prezidente Repúblik n. 81/2021, loron 28 fulan-setembru, hodi hatán ba pandemia COVID-19.

Estadu emerjénsia bá dala-18 ne’e, sei abranje bá territóriu nasionál tomak, tanba ne’e, sei tama iha vigora entre oras 00:00 loron 30 fulan-setembru tinan 2021 to’o oras 23:59 loron 29 fulan-outubru.

Tanba ne’e, Ministru Prezidénsia Konsellu Ministru, Fidélis Leite Magalhães informa, bá ema ne’ebé viajen husi nasaun ne’ebé variante Delta ejiste mai Timor-Leste, tenki simu ona vasina dalarua, no mós hatudu provas teste negativu bá pessoál saúde sira durante oras 48.

Nune’e, bainhira rezultadu teste komprovadu megativu, maka ema hirak ne’e, bele la’o livre, no la presiza submete bá kumpre izolamentu durante loron 5.

“Mezmu ké nia mai husi paizes hirak ne’ebé mak iha ona variante Delta, nia bele mai tama iha rai laran, no rekizitus maka dentru de 48 oras, nia tenki fó bá pessoál sira komprovativu katak, teste negativu, la presiza atu halo izolamentu obrigatóriu durante loron 5 ne’ebé mak atualmente iha hela,” dehan Ministru Fidélis Magalhães kuarta ohin iha Palásiu Governu.

Konsellu ministru mós halo alterasaun bá mudansa kona-ba medidas ezekusaun deklarasaun estadu emerjénsia nian, bainhira ema hirak ne’ebé mak mai husi rai li’ur, tenki hatudu komprovativu vasina dalarua, inklui rezultadu teste negativu.

“Iha alterasaun ida-ne’e, konsellu ministru mós sei inklui klauzula ida kona-ba nesessidade atu halo intervensaun sira atu impoin rekizitus sira hanesan husu komprovativu vasina nian, sé karik iha surtu derepdente ruma iha zona balun ia territóriu nasionál. Ne’ebé fulan oin mai ne’e, sé bainhira ema ne’e mak komprovadu negativu hafoin nia tama iha rai laran durante 48 oras, nia bele lívre ona,” afiirma Fidélis.

Parte seluk, governante ne’e hatutan, konsellu ministru deside la renova ona impozisaun serka sanitaria iha munisípiu Dili, bainhira serka sanitaria atuál remata.

“Konsellu ministru mós deside la extende serka sanitaria iha munisípiu, ne’ebé serka sanitaria iha munisípiu Dili laiha ona, bainhira ida-ne’ebé vijente ne’e hotu,” informa nia.

Alem de ne’e, governu mós introdús iha medidas ezekusaun deklarasaun estadu emerjénsia bá dala-18 ne’e, iha ne’ebe ejize funsionáriu públiku sira tenki vasina, nune’e labele fó rísku fali bá ema seluk iha servisu fatin.(ant)