Front Line ba Jornalista Konsidera ho $ 5 Kada Loron, Selu Husi Abril-Dezembro 2021

Smnewstl.com 11-11-2021 (Dili) – Governu liu husi reuniaun konsellu ministru, aprova ona projetu dekretu-lei kona-ba kriasaun subsídiu front line bá jornalista sira ne’ebé dezenvolve ona atividade jornalístika hodi fó sai notísia kona-ba vírus SARS-CoV-2 durante estadu emerjénsia.

Proposta projetu dekretu-lei ne’e, aprezenta husi Ministru Assuntu Parlamentar no Komunikasaun Sosiál (MAPKOMS), Francisco Jerónimo, iha reuniaun Konsellu Ministru ordinária Kinta-feira ne’e iha Palásiu Governu.

“Konsellu Ministru aprova projetu dekretu-lei kona-ba kriasaun subsídiu bá profisionál sira-ne’ebé dezenvolve ona atividade jornalístika ne’ebé governu hodi fornese notísia kona-ba vírus SARS-CoV-2 liu-liu presizamente bá sira-ne’ebé hala’o servisu durante estadu emerjénsia,” dehan Ministru Fidélis Magalhães.

Fidélis Magalhães hatutan, Konsellu Ministru mós aprova tabela montante orsamentu ne’ebé sei atribui bá profisionál jornalista ne’ebé mak governu husu hodi fornese notísia bá públiku kona-ba vírus SARS-CoV-2 iha Timor-Leste.

Tanba ne’e, tuir tabela ne’ebé aprova ona, kada jornalista sei hetan dólar $ 5 ne’ebé sei selu husi fulan Abríl to’o Dezembru.

“Suplementu ninia tabela ne’e dólar $ 5 bá jornalista sira-ne’ebé kualifikadu, ne’ebé mak nia lista iha ona MAPKOMS verifika hotu tiha ona ne’e dólar $ 5, ninia periódu kobertura ne’e husi Abríl to’o Dezembru,” relata nia.

Entretantu, antes ne’e, Ministru MAPKOMS, Francisco Jerónimo hateten, lista jornalista benefisiáriu sira, iha Ministériu no mós verifikadu ona, hafoin kada instituisaun média sira submete bá governu.(ant)