Formasaun Alfabetizasaun Adultu Sai Ajenda Prioridade Bá Embaixadór TL

Smnewstl.com Media Online  — Programa formasaun kona-ba ana-alfabetizasaun bá ema adultus sira kontinua sai ajenda prioridades mós bá Embaixadór foun Timor-Leste nian bá Cuba, Eusébio Corsino de Araújo, nune’e bele koordena ho governu Cuba atu implementa programa ne’e.

Embaixadór Timor-Leste bá Cuba, Eusébio Corsino hateten, nia sei halo esforsu atu ko’alia ho governu Cuba atu kontinua formasaun kona-ba programa alfabetizasaun bá timoroan sira ne’ebé ana-alfabetu, tanba programa ne’e etapa dahuluk implementa ona no sei falta etapa daruak.

“Klaru ké bá alfabetizasaun ita iha etapa primeiru ona, ita falta segunda etapa, segunda etapa ne’e atu halo edukasaun bá adultus, ne’e par adultus sira fó kontinuidade, maibé iha ona alfabetizasaun bá adultus sira-ne’e ita tenki prepara fila-fali, ita tenki bá koordena nafatin ho Cuba par sira ké sira mós mai fó fila-fali formasaun bá ita-nia ema rasik iha rai laran par bele fó fila-fali formasaun bá sira adultus,” dehan Embaixadór, Eusébio Corsino, sesta (23/07/21), hafoin remata enkontru ho Primeiru-Ministru, Taur Matan Ruak, iha rezidénsia Farol, Dili.

Diplomata ne’e hatutan, programa alfabetizasaun ne’e importante tebes no sai ajenda prioridades entre Timor-Leste ho Cuba, tanba atu alfabetizasaun mak kria obskurantízmu.

“Klaru ké ida-ne’e mós sai prioridade ida bá ita-nia rain, porque ita hatene, alfabetizasaun ne’e mai kria obskurantízmu, par ita atu sai husi obskurantízmu nia laran, ita presiza alfabetiza ita presiza prepara ita-nia povu. Ami-nia papel to’o bá iha ne’ebá atu mobiliza hanusa mak sira bele mai, maibé iha ne’e, sei desizaun ikus liu governu sentrál,” subliña nia.

Tanba ne’e, tenki fó prioridade, maibé, depende bá koordenasaun entre ho governu Timor-Leste ho governu Cuba.

Bá Timor-Leste, ministériu edukasaun juventude no desportu mak sei deside bainhira mak atu fó kontinuidade.(ant)