Forca EUA Ho F-FDTL Sei Halao Ezersisiu Konjunta

Smnewstl.com — Soldadu husi Estadus Unidus no FALINTIL Forsa Defeza Timor-Leste (F-FDTL) sei partisipa iha exersísiu Dalan ba Dame 21 (DbD21) husi loron 26 Jullu to’o 6 Agustu 2021 iha baze Komponente Terrestre F-FDTL nian iha munisípiu Baucau, Timor-Leste.

DbD21 marka tinan dahuluk ezersísisu forsa Terrestre entre Estadus Unidus no Timor-Leste nu’udar parte ida kontinuisaun ezersísiu bilateral ne’ebé deseña hodi promove paz no siguransa rejional.

“Ezersísiu dalan ba Dame ezemplu importante ida konaba parseria ne’ebé metin no klean liu tan entre Estadus Unidus no Timor-Leste,” Embaixador Kevin Blackstone hateten, liu husi komunikadu imprensa ne’ebé Smnewstl.com husu Embaixada Estadus Unidus Amérika (EUA), segunda (26/07/2).

“Ho partisipasaun iha formasaun konjunta ne’e, ita servisu hamutuk infrenta ho susesu dezafiu komun sira no iha tempu hanesan ita promove siguransa rejional no internasional. Hau hakarak agradese governu Timor-Leste ne’ebé permiti ezersísiu ida ne’e lao ho siguru durante pandemia ida ne’e,” hatutan nia.

Ezersísiu ne’ebé patrosinadu husi Forsa Militar Pasífiku EUA ne’e involve soldadu Amerikanu nian 70 no F-FDTL nain 150 ne’e sei hadiak sira nia kapasidade interoperabilidade no interkámbiu kultural.

Formsaun ne’e sei hahu ho fahe esperiensia husi espesialista sira no semináriu dezenvolvimentu profesional ne’ebé sei foka liu ba abilidade básiku infantaria, operasaun siguransa hanesan kontrolu pontu tráfiku, jestaun detensaun iha nivel kompañia no nivel ki’ik sira seluk.

Forsa Militar EUA sei halo tuir rekerimentu no guiaun sira COVID-19 nian durante hela iha Timor-Leste.(*/ant)