Foinsa’e Munisípiu 12 Inklui RAEOA Laran Monu ba João Saldanha, Hakarak Lori ba Tu’ur Aitarak Laran

Smnewstl.com 24-10-2021 (Dili) – Reprezentante Juventude husi munisípiu 12 no Rejiaun Administrativa Espesiál Oe-cusse Ambenu (RAEOA) ne’ebé estuda iha Dili deklara sei fó apoiu tomak bá João Mariano Saldanha atu kandidata independentemente bá Prezidente Repúblika (PR) iha eleisaun Prezidensiál 2022.

Porta-voz Rui Soares Lopes hateten, hanesan juventude ne’ebé estuda iha Dili, iha direitu atu depozita konfiansa bá sidadaun ne’ebé iha kapasidade polítika intelektuál atu kompete iha eleisaun tuir mandatu ne’ebé prevé ona iha artigu 46 konstituisaun RDTL kona-ba direitu bá partisipasaun polítika, no artigu 63 mós fó biban partisipasaun polítika sidadaun sira-nian.

Reprezentante foinsae hirak ne’e konsidera João Mariano Saldanha nu’udar figura ne’ebé iha esperiénsia no iha kapasidade polítika intelektuál atu hadi’a povu nia moris.

“Ami reprezentante juventude munisípiu 12 no RAEOA ne’ebé estuda iha Dili laran, ho laran tomak hakarak manifesta ami-nia apoiu bá Dr João Mariano Saldanha hanesan kandidatu independente, tanba ami garante katak João Mariano Saldanha nu’udar figura ida-ne’ebé iha skills, kapasidade polítika intelektuál bele rezolve problema ne’ebé Timor-Leste infrenta,” deklara iha komferénsia imprensa ne’ebé hala’o iha Jardim 5 de Maio, Domingu ne’e.

Tuir sira, atu asegura dezenvolvimentu ne’ebé inovativu, presiza Prezidente Repúblika ne’ebé iha esperiénsia másimu no kapasidade polítika intelektuál ne’ebé klaru, nune’e bele kria planu integradu bá futuru nasaun nian.

Rui Soares konfirma katak, João Mariano Saldanha konfirmadu ona atu kompete iha eleisaun prezidensiál tinan 2022.

“Konfirmadu katak nia sei kompete, ami husu apoiu liu husi karta ida-ne’e atu nia tenki kandidata a’an,”dehan Rui.

Atu konkretiza lori atual Prezidente Partido Republikanu ne’e ba Aitarak Laran, Rui promete sei tun ba baze konsolida nune’e bele hetan votus.

Ami iha komitmentu no vontade tomak tun baze halao servisu hodi fo susesu ba Joao Mariano Saldanha, tamba ami laiha duvidas ho nia kapasidade intelektual.

Maske nunune’e, Joao Mariano Saldanha rasik to’o oras ne’e seidauk reafirma offisial ligado ho nia kandidatu.(ant)