Foinsa’e 300 Resin Reafirma Apoiu ba Xanana Gusmão Hasoru Festa Demokrasia

Smnewtl.com 19-12-21 (Dili) – Movimentu Juventude Apoiu Xanana (MOJAX) deklara ofisialmente ho konsiénsia atu fó apoiu bá Líder Karismátiku, Kay Rala Xanana Gusmão iha eleisaun prezidensiál 2022 no eleisaun parlamentár 2023.

Mojax nu’udar movimentu juventude ne’ebé reprezenta husi juventude husi munisípiu 12 inklui enklave Oe-cusse ne’ebé deside afilia husi partidu FRETIILIN, PLP, PD, KHUNTO no seluk tan hamutuk 350, ne’ebé deside fila bá CNRT hodi fó vitória bá Xanana Gusmão iha eleisaun prezidensiál no parlamentár.

Porta-voz Mojax, Benjamin Fernandes Barreto hateten, objetivu sira deside hakarak hamutuk ho Líder Karismátiku, Kay Rala Xanana Gusmão, tanba sira fi’ar katak, só Xanana Gusmão de’it mak bele halo dezenvolvimentu atu kore povu husi ki’ak no mukit.

“Ami joven haree katak, lideransa avo Nana de’it mak hadomi no hakuak povu no joven sira, ami joven mós fi’ar katak, patidu CNRT liu husi lideransa avo Nana duni mak iha vizaun no missaun no programa polítika ne’ebé di’ak hodi lori dezenvolvimentu sustentável bá ita-nia nasaun,” dehan Porta-voz Mojax, Benjamin Fernandes Barreto, liu husi komferénsia imprensa ne’ebé hala’o iha sede CNRT Bairo dos Grilhos, Dili, Domingu ne’e.

Mojax konsidera, Xanana Gusmão ho nia partidu CNRT de’it mak iha polítika ne’ebé firme no konsistente atu define no asegura riku-soi mina no gás, nune’e bele dada kadoras Greater Sunrise mai Timor-Leste.

Sorin seluk, Koordenadór Jerál Komisaun Jurisdisaun Partidu CNRT, Adérito Hugo da Costa hateten, Mojax deside afilia bá partidu CNRT, tanba haree bá impasse polítika desde 2017 to’o ohin loron fó impaktu boot bá dezenvolvimentu nasionál.

Nia hatutanm, atu rekopera fali situasaun 2017 hodi hadi’a setór ekonomia, defeza no seguransa no mós atu dinamiza prosesu dezenvolvimentu nasionál hanesan iha 2017 bá kotuk, presiza tempu ne’ebé naruk tebes.

“Bá sira dalan úniku mak tenki reforsa kamada sosiál polítika hotu-hotu iha paíz ida-ne’e par atu bele reforsa CNRT, espetativa maioria povu nian par atu rekopera hanesan 2017 bá kotuk ne’e só presiza partidu boot ho lideransa ne’ebé iha vizaun klaru hanesan Maun Boot Xanana,” dehan Adérito Hugo.

Hugo relata, Mojax hanesan nukleo ki’ik-oan ida ne’ebé hahú espalla ona iha munisípiu liu sira-nia rede rasik, tanba balun mai husi militante no kuádru partidu balun nian mak deside hodi reforsa CNRT.

Tan ne’e Adérito Hugo garante, ho prezensa Mojax hanesan mós movimentu sira seluk akontes iha nível nasionál iha nível munisípiu sira, hotu-hotu ho ninia motivu ida de’it, atu fó forsa bá CNRT iha eleisaun prezidensiál no parlamentár.(ant)