Fila Husi Mate, Pasiente Covid1-19 Ho Matawen Husu Ema Hotu Vasina

Smnewstl.com 24-09-2021 (Dili) – Pasiente Covid-19 Bacelar Martins Correira ho tinan 52 fó sasin katak, moras Covid-19 ejiste duni iha Timor-Leste, tanba ne’e husu ema hotu atu simu vasina no kumpre nafatin regras saúde nian.

Pasiente Bacelar Martins Correira hanesan mós veteranus no eis Administradór Postu Administrativu Railako Munisípiu Ermera haktuir, nia halo teste swab iha loron 15 fulan Agostu iha loron 16 fulan Agostu, rezultadu teste hatudu pozitivu bá Covid-19.

Nune’e, iha loron ne’e kedas, nia baixa iha ospitál Gleno durante semana ida, maibé ho kondisaun krítiku, tanba ne’e, médiku sira husi Gleno deside transfere Bacelar mai iha sala izolamentu Lahane Dili.

Maibé haree bá pasiente refere nia kondisaun hahú rekoperadu, maka médiku sira deside hodi muda ona mai iha Ospitál Nasionál Guidu Valadares (HNGV) iha Sala FIW cubículo D-2.

“Tama iha ne’ebá iha dia 22 de Agostu, iha atendimentu saúde nian durante semana ida bá faze tratamentu bá Covid-19 nian, tanba haree bá ha’u iha mudansa oituan, transfere fali ha’u husi sentru izolamentu Lahane nian mai iha HNGV, iha dia 29 de Agostu até a data ohin dia 24 de setembru,” informa Pasiente Rekoperadu Covid-19, Bacelar Martins Correira bá jornalista iha HNGV, sesta ohin.

Bacelar haktuir, nia infetadu Covid-19 ho kondisaun gráve, maibé ikus mai konsege rekopera, tanba konsege simu ona vasina AstraZeneca kompletu doze rua, inklui atendimentu ne’ebé di’ak husi profisionál saúde sira.

“Ha’u iha mudansa lubuk ida, tanba antes ne’e gráve, tanba sofre moras Covid-19, nia tama sorte ha’u ne’e hanesan ema ne’ebé mak vasinadu kompletu, ho ida-ne’e mak ita bele tama karik hanesan iha lutu laran nia atu estraga ita mós konsege ita salva. Sé mak ita zero ema ida-ne’ebé mak bele vítima ona bá moras ida-ne’e, maibé tanba vasina, rezultadu vasina ne’e hodi bele lori ha’u to’o saúde rekopera fila-fali,” afirma Bacelar.

Pasiente Bacelar mós agradese bá profisionál saúde hotu, tanba bele salva ona nia vida, hahú husi Gleno mai iha izolamentu Lahane to’o iha HNGV.

“Ne’e ha’u hatete luar biasa maromak mak hatene, sira-nia servisu atendimentu ne’e luar biasa ita ko’alia lialoos iha rai hatene lalehan mós hatene katak, sira-nia servisu ne’e la fasíl, buat ne’ebé sira halo ne’e ema iha li’ur bele halo buat ida-ne’e, sira buka meius atu salva ema seluk nia aan, sira mós afeta tan moras ida-ne’e,” apresia nia.

Sasain ne’e akresenta, sente hakfodak bainhira infetadu bá Covid-19, tanba sintomas husi virus corona nian hanesan mear, isin-manas, malaria no seluk tan, la hanesan ho moras ne’ebé baibain hasoru.
Tanba ne’e, pasiente Covid-19 ne’e mós apela bá populasaun tomak iha Timor-Leste, atu hakat bá sentu saúde sira hodi simu vasina, tanba moras Covid-19 perigus tebes bá ema-nia vida, ne’eduni só úniku vasina de’it mak bele salva ita-nia vida husi Covid-19.

Nune’e mós labele fi’ar informasaun falsu ne’ebé fó sai iha media sosiál, maibé fi’ar de’it mak informasaun ne’ebé ministériu saúde fó sai hanesan, uza máskara, fase liman ho sabaun, inklui respeita serka sanitaria ne’ebé esplika iha Timor-Leste.

Fatin hanesan, Doutór Internísta HNGV, Hélio Guterres informa, pasiente transfere husi ospitál Gleno munisípiu Ermera ho saturasaun oksijéniu ne’ebé menus tebes, nune’e evakua bá sala izolamentu Lahane hodi halo tratamentu hanesan pasiente Covid-19 nian.

Nia hatutan, tuir protokolu Covid-19 nian, bainhira halo tratamentu iha izolamentu Lahaneno halo teste swab PCR dalarua ona bele transfere ona bá iha HNGV.

“Tuir protokolu ne’ebé iha, bainhira nia halo ona tratamentu iha loron balun nia laran, iha Lahene ami halo swab tan bá nia, depois iha tempu balun swab PCR negativu dalarua, nia sei nafatin presiza oksijéniu, entaun transfere mai iha Guidu Valadares depois de nia rezultadu PCR dalarua negativu,” dehan Doutór Hélio.

Doutór Espesialísta Internísta ne’e hatutan, pasiente Bacelar Martins Correira nia kondisaun gráve liu kompara ho pasiente post Covid-19 sira uluk.

“Nia kondisaun dalaruma todan liu kompara ho pasienta sira seluk, tanba ami iha pasiente post Covid-19 nian ne’ebé antes baixa ona iha Lahane no baixa iha vera kruz,” dehan nia.

Dadauk ne’e pasiente Bacelar Martisn halo tratamentu iha HNGV kuaze semana tolu ona, tanba ne’e, tempu badak pasiente refere bele alta fila bá uma ona.(ant)