Fila Husi Hafolin Feto Hetan Asidente, Ema Nain 16 Kanek Todan no nain 18 Kman ‘La Rezista Lakon Vida’

Smnewstl.com, 01-09-2021 (Dili)– Kareta Basculante ida ho numeru natrikula, 25-261 TL, Kinta-feira ne’e hetan asidente iha Suco Hohorai-Kik, Posto Administrativo Maubisi, Municipio Ainaro.

Asidente ne’e akontese tuku sia dadersan hodi rezulta ema nain 16 kanek todan no nain 18 kanek kman.

Ba SMNews via telefone, Komandante Policia Municipio Ainaro, Superintendente Justinho Menezes haktuir, vitima sira kompostu husi feto nain 9, mane nain 25.

Nia haktuir, Bascolante ho diresaun husi Aldeia Datriri, Suco Mulo, Posto Hatubuilico, Municipio Ainaro atu ba Posto Administrativo Letefoho, Municipio Ermera.

“Familia ida maka ba hasai feto foun husi Aldeia Datiri. Motivu ne’e dehan katak, kondutor kondus kareta ho velosidade maka’as nune’e labele domina volante hodi rezulta soke deker ka bareira iha Estrada ninin kuaze metru rua,”nia informa

Nia hatutan, vitima sira evakua kedas ba Hospital Referal Maubise hodi hetan asistensia mediku.

Enkuanto nain 16 ne’ebe kanek todan posibilidade evakua ba Hospital Nacional Guido Valadares Dili.

Kona ba motorista, Superintendente ne’e dehan, sofre kanek kman no sei prosesa tuir lei tamba kondus transporte ho velosidade a’as hodi rezulta asidente inklui vitima.

Husi sira ne’ebe sofre kanek to’o oras ne’e seidauk rezista lakon vida, maske antes ne’e espalha ona ba publiku kona ba nain 7 mak mate.(Rio)