Evita Lori Kareta Estado ba Uma, Governu Planu Sei Kria Subsídiu Alimentár Ho Transporte ba Funsionáriu

Smnewstl.com (Dili) — Ministru Finansas, Rui Augusto Gomes, aprezenta opsaun polítika lejislativa bá konsellu ministru kona-ba subsídiu alimentár no subsídiu transporte bá funsionáriu públiku sira.

Ministru Prezidénsia Konsellu Ministru, Fidélis Manuel Leite Magalhães esplika, opsaun polítika lejislativa primeiru mak, governu planeia sei kria subsídiu transporte bá funsionáriu públiku liu-liu bá diresaun kargu xefia sira, nune’e evita atu lori kareta estadu nian uma.

Nune’e mós, ezekutivu sei kria subsídiu alimentár bá ajente administrasaun públika sira-ne’e.

“Tuir mai konsellu ministru mós rona aprezentasaun rua husi ministru finansas, ida kona-ba opsaun polítika lejislativa kona-ba kriasaun subsídiu alementár bá funsionáriu públiku sira, konsellu ministru mós rona polítika ida kona-ba subsídiu bá transporte bá funsionáriu públiku sira no jestaun frota,” dehan Ministru Fidélis Magalhães, kuarta (18/08/21) hafoin remata enkontru konsellu ministru iha Palásiu Governu.

Fidélis Magalhães esplika, objetivu husi opsaun polítika lejislativa refere mak sei la entrega kareta estadu nian bá diresaun kargu xefia sira iha Dili, tanba patrimóniu estadu hirak ne’e, sei entrega fali bá liña ministériu sira ne’ebé mak hala’o servisu administrasaun besik liu povu, liu-liu iha munisípiu sira.

“Objetivu husi polítika ida-ne’e mak, atu iha futuru mai sei la atribui kareta sira bá funsionáriu públiku sira bele lori bá uma, kareta sira sei kareta operasionál de’it sei halo jestaun frota ne’ebé di’ak liu, atu nune’e ita aloka duni kareta sira bá ne’ebé mak presiza duni iha liñas ministeriais sira ne’ebé fó servisu lor-loron bá sidadaun,” dehan nia.

Nia hatutan, opsaun polítika lejislativa ne’e mós importante atu kontribui bá redusaun despezas bá manutensaun kareta no mós kombustível, tanba durante tinan 20 ne’e, governu gasta ona osan hamutuk hamutuk tokon $ 200 bá manutensaun ho kombustível.

“Ho proposta ida-ne’e mós sei fó subsídiu bá funsionáriu sira, par nune’e kargus xefia sira la presiza lori kareta bá uma, kareta sira uza bá iha durante oras servisu de’it, maibé bainhira fila bá uma ho kareta sira-nian rasik, atu nune’e bele redús gastus barak ne’ebé mak oras ne’e iha. Gastus bá kombustível no gastus bá manutensaun, iha tinan 20 nia laran ita gasta liu husi $ 200 milloens ona bá de’it kombustível no manutensaun bá kareta sira,” subliña nia.

Ho nune’e, ezekutivu sei kria subsídiu transporte mensál bá funsionáriu públiku sira, nune’e sira bele iha kbiit hodi la depende bá patrimóniu estadu nian.

Alem de ne’e, governu mós sei halo leilaun kareta estadu nian ne’ebé liu ona tempu utilizasaun nian, nune’e bele kontribui bá redús despezas manutensaun nian, tanba kareta ne’ebé liu ona tempu utilizasaun, sei fó impaktu bá kustu manutensaun.(ant)