EUA Apoiu Osan Milliaun $2.3 Bá TL Luta Kontra Covid-19

Smnewstl.com 10-09-2021 (Dili) – Estadus Unidus Amérika (EUA) fó apoiu orsamentu adisionál hamutuk milliaun $ 2.3 bá governu Timor-Leste hodi luta kontra Covid-19 iha Timor-Leste.

Tuir komunikadu imprensa ne’ebé Smnewstl.com asesu husi embaixada EUAkatak, totál kontribuisaun estadus Unidus nian to’o ohin loron hamutuk Millaun $4.
Tanba ne’e, Estadus Unidus Amérika sente kontente hodi anunsia fundu adisionál millaun $2.3 iha asisténsia, hodi ajuda Timor-Leste luta hasoru COVID-19 no haforsa seguransa saúde nian. Fundu foun ne’e sei uza ba hari’i fasilidade saúde hodi permite ho di’ak liután Governu Timor-Leste salva ema nia moris.

Dezde pandemia ne’e hahú, Estadus Unidus Amérika servisu ona hamutuk ho Timor-Leste hodi luta hasoru COVID-19, inklui fornese millaun $4 iha asisténsia ne’ebé krítika tebes.

Kompromísu husi osan millaun $2.3 ne’e sei fornese finansiamentu hodi hahú servisu ba projetu tolu hanesan harik fasilidade izolamentu sira iha ospitál rejionál iha Baucau, harii unidade móvel kuidadu intensive iha Dili no mós fura bee matan h aBatugade hodi bele apoiu bee moos no saneamentu bá sentru kuarentena iha fronteira.

Reprezenta esforsu tomak husi Governu Estadus Unidus hodi apoia Timor-Leste, tanba ne’e, fundu refere fornese husi Misaun Estadus Unidus nian iha Timor-Leste, liuhusi Ajénsia Estadus Unidus ba Dezenvolvimentu Internasionál (USAID) no Komando Indo-Pasífiku Estadus Unidus kolabora hamutuk ho Korpu ba Paz, maibé obra ne’e sei halao liuhusi serbisu hamutuk ho UNICEF.

“Estadus Unidus hamriik metin ho Timor-Leste hanesan amigu no parseiru duradouru hodi ita hamutuk kombate COVID-19. Ami kontinua intensifika ami-nia asaun hodi ajuda Timor-Leste atu salva ema nia moris tanba ida-ne’e maka buat loos ne’ebé ami presiza halo,” haktuir Enkaregadu Negósiu Embaixada Estadus Unidus iha Dili Tom Daley.

Estadus Unidus mós adopta abordajen abranjente ida hodi hapára pandemia ida-ne’e, halo mitigasaun ba estragu hirak ne’ebé COVID-19 kauza ba ema no sosiedade sira, no reforsa rekuperasaun iha nível globál no prontidaun atu hasoru ameasa kauza husi pandemia iha futuru.

Entretantu, apoiu refleta nu’udar kompromisu forte Estadus Unidus nian hodi hapára pandemia ne’e, tanba iha fulan Juñu, Prezidente Biden anunsia katak, Estadus Unidus sei fahe doze sira husi fornesimentu vasina ba mundu tomak.

Estadus Unidus fornese no fahe ona doze vasina besik millaun 110 ba nasaun sira hamutuk 60 – no ne’e foin maka hanesan inísiu deit.

Tanba ne’e, Estadus Unidus sei kontinua fornese asisténsia ba Timor-Leste hanesan parte ida husi sira-nia kompromisu hodi lidera resposta iha nível global hasoru pandemia ida-ne’e.(ant)