Konfirmado, Timor Resources Hahú Halo Perfurasaun Uluk Mina Matan 2

Smnewstl.com 26-10-2021 (Covalima) – Tuir komunikadu imprensa ne’ebé Smnewstl asesu husi Autoridade Nasionál Petróleu no Minerais (ANPM) katak, Kuarta-Feira aban (27-10-21), kompañia Timor Resources sei halo perfurasaun bá mina matan rua iha área Rai Maran/Onshore iha Suai – Covalima.

Timor-Leste ho nia istoria luta ba ukun rasik an durante tempu naruk nia laran, hosi prosesu ukun-an ne’e veteranus sai nudar elementus importante depois de Timor Leste ukun an.

Liu hosi esforsu Veteranus Timor Leste no Austrália konsege atrai investidor ida nudar mos Veteranus Austrália konsege lori investimentu iha atividades Petrolífera iha rai maran/Onshore, perfurasaun ida ne’e hanesan perfurasaun ba dahuluk iha tempu ukun an depois de perfurasaun primeiru iha tinan 50 liu ba durante tempu Portuguese tinan 1971 iha Suai Loro.

Tanba ne’e, ANPM hanesan entidade Autoridade Reguladora servisu hamutuk ho entidade relevantes sira organiza serimónia lansamentu formál ba atividade perfurasaun posu rua dahuluk iha área kontratu PSC TL-OT-17-08 ho naran Posu Feto Kmaus no Posu Liurai ne’ebé lokaliza iha Suai -Covalima.

Autoridade Nacional do Petróleo e Minerais (ANPM) hanesan Autoriedade Reguladora ba atividades Petróleo no Minerais hakarak informa katak iha área kontratu PSC TL-OT-17-08 no PSC TL-OT-17-09 hanesan área kontratu rua ne’ebé mak Governu Timor-Leste liu hosi ANPM halo/asina ho Timor Resources Pty Ltd (TR) hanesan operador no nia parseiru TIMOR GAP Onshore Block, Unipessoal Lda (Timor GAP) iha tinan 2017.

Kontratu ne’ebé iha hatu’ur kompromisiu hosi TR no Timor GAP atu halo perfurasaun mínimu posu peskiza 1 (ida) ho nia profundu (klean) 2000 metrus vertikalmente ou posu lubuk balun ho profundu kumulativu 2000 metrus vertikalmente área kontratu PSC TL-OT-17-08 no posu peskiza 1 ho profundu hanesan iha área kontratu PSC TL-OT-17-09 no mós posu kontinjensia 1 iha kada bloku.

Ho nune’e Timor Resources hanesan operador ba kampu rua ne’e submete ona pedidu atu halo perfurasaun ba posu 2 iha área kontratu PSC TL-OT-17-08 no posu 1 iha área kontratu PSC TL-OT-17-08.

No oras ne’e dadaun ANPM kontinua halo avaliasaun, inspeksaun hodi bele fo aprovasaun ba perfurasaun posu 3 ne’e.

Loron Tersa, 26 Outubru 2021:

Conselho dos Combatentes da Libertação Nacional (CCLN) Suai -Covalima sei organiza hader kalan hodi hasae Onra ba Herois no Martires da Libertasaun Nasional ne’ebé mak sakrifika ona sira nia an ba libertasaun rai ida ne’e liu hosi; Hader Kalan, Misa no Kari Aifunan iha Monumentu Masakre Suai – Covalima.

Loron Kuarta, 27 Outubru 2021

Lansamentu Formál ba atividade Perfurasaun dahuluk iha área rai maran hafoin tinan 50, Posu Feto kmaus Suai – Covalima.

Primeiru-Ministru (PM), Taur Matan Ruak, hamutuk ho Ministru Petróleu no Minerais (MPM), Victor da Conceição Soares, ANPM, no entidade seluk tan, mak halo lansamentu ofisiál bá perfurasaun dahuluk mina matan rua iha área rai maran nian.(*/ant)