Ekipa Apoiu Horta: Marí Alkatiri no Nakfilak la iha koñesimentu klean ba konstituisaun.

Smnewstl.com 04-03-2022 (Dili) – liu husi konferensi Imprensa Sexta-feira ne’e, Ekipa Apoiu Kandidatura Dr. José Ramos-Horta konsidera katak Mari Alkatiri ho nia adjuntu maka la iha koñesimentu klean kona-ba konstituisaun ne’ebé liga ho prinsípiu separasaun poder no interdependénsia ba poder.

Pozisaun ne’e aprezenta, relasiona ho intervensaun husi Sekretáriu Jeral FETILIN, Mari Alkatiri no Adjuntu Sekretáriu Jeral José Nakfilak, durante komísiu FRETILIN iha loron 3 fulan marsu iha Ermera.

Lideransa FRETILIN konsidera katak, Kandidatu númeru sorteiu 14, la iha koñesimentu ba konstituisaun hodi kahur poder exekutivu ho poder Prezidente Repúblika, wainhira kandidatu Dr. Ramos-Horta koalia iha komísiu iha Lospalos, katak, karik eleitu, nia sei hari eskola, “PUSKEMAS”, no seluk seluk tan.

Ekipa Kandidatu Dr. José Ramos-Horta, defende katak, DR. José Ramos-Horta hatene klean assuntu konstitusional no karik mana’an sei exerse nia papel iha suprevizaun ba exekusaun ba Programa Dezenvimentu – ekonómiku-sosío-kultural.

Tuir ekipa suseseu kandidatu ho númeru sorteiu 14, Prezidente Repúblika maka promulga ou veta leis ba Orsamentu Jeral Estadu no leis ne’ebé liga ho exekusaun ba programa dezenvolvimentu nasional, iha aspetu oi-oin.

Ekipa Dr. José Ramos Horta promete, wainhira Dr. José Ramos-Horta eleitu nudar Prezidente Repúblika, nia komprometidu atu la-veta lei sira ne’ebé liga ho dezenvolvimentu infraestrutura sira, hanesan: konstrusaun eskola, “Puskesmas” (hospital), loke no rehabitasaun estrada sira iha teritóriu nasional, hadia no hari kanalizasaun bé mos ba populasaun no mos hari no rehabilita sistema irigasaun ba agrikultura.
Ba ekipa, Karik governu la prevé orsamentu ba área sosial sira ne’e, Prezidente Repúblika uza nia papel ka kna’ar hodi intervén, liu husi diálogu hodi husu governu tau konsiderasaun ba áreas importantes referidas.

Ekipa Apoiu Kandidatura Dr. Jose Ramos-Horta mos rekorda katak, afinal iha momentu Dr. Mari Alkatiri propoen konstituisaun, nia konfundi tia sistema parlamentar ho sistema semíprezidensial, no karik asuntu ne’ebé liga ho interdependénsia entre Orgaun Sobetrania, Mari Alkatiri ho nia Adjuntu, Jose Nakfilak entende sala.

Tamba ne’e, Ekipa Apoiu Kandidatura nafatin defende katak wainhira Dr. Ramos Horta eleitu ba Prezidente iha periúdu 2022-2027, nia sei nafatin defende programa sira iha ámbitu sosial, ekonómiku no kultural. (Ant)