Durante Loron 10, Governo Liderado Taur Matan Ruak Konsege Fó Vasina Populasaun 78.165

Smnewstl.com 13-10-2021 (Dili) – Iha reuniaun konsellu ministru, Ministra Saúde, Odete Maria Freitas Belo aprezenta rezultadu kampaña vasinasaun kontra Covid-19 ho partisipasaun membru governu nian ne’ebé hahú iha loron 30 fulan setembru to’o loron 10 fulan outubru tinan 2021.

Durante ne’e, membru governu sira, tun bá iha munisípiu ida-idak, fahee mós imformasaun bá populasaun sira kona-ba vasina kontra Covid-19, no mós sensibiliza bá populasaun kona-ba nesessidade husi vasina nian.

Iha aprezentasaun ne’e, Konsellu Ministru mós halo avaliasaun kona-ba partisipasaun governante sira-nian iha kampaña vasinasaun ne’ebé hahú iha loron 30 setembru to’o dia 10 outubru.

Ministru Prezidénsia Konsellu Ministru, Fidélis Manuel Leite Magalhães hateten, ho partisipasaun membru governu sira-nian ne’e, konsege hasa’e taxa vasinasaun 17% husi nível nasionál kompara ho persentajen anterior, no mós administra ona vasina bá populasaun hamutuk 78.165 kompara ho númeru vasina anterior nian.

“Durante periódu ne’e, ita rejista iha mudansa pozitivu balun, ita haree katak, dezde hahú kampaña partisipasaun membru governu sira-nian, administra ona totál vasina ho númeru 78.165, hanesan aumentu ida modu jerál 17% husi persentajen vasinasaun iha nível nasionál,” informa Ministru Fidélis Magalhães, hafoin remata enkontru konsellu ministru iha Palásiu Governu, Dili. Kuarta ohin.

Durante periódu kampaña vasinasaun ne’e, iha munisípiu Bobonaru, Baucau no Ermera mós rejista, númeru kreximentu vasinasaun kontra Covod-19 ne’ebé signifikativu kompara ho semana hirak liu bá.

“Iha munisípiu Bobonaru rejista kreximentu númeru ema ne’ebé bá vasina ho númeru boot iha aumentu 303%, ho totál hamutuk ema 7487. Iha munisípiu Baucau mós rejista kreximentu ne’ebé mak di’ak tebes ho aumentu 122%, ho vasinasaun bá ema hamutuk 5286 sé ita kompara ho inísiu kampaña ninian. Iha munisípiu Ermera mós iha aumentu ho 97% sé ita kompara ho semana anterior antes de kampaña, munisípiu Ermera mós rejista númeru ema bá vasina aumentu foun 3885,” relata Fidélis.

Tanba ne’e, Ministru Fidélis fi’ar katak, ho kampaña vasinasaun ne’e, sei bele aumenta liután númeru vasinasaun iha territóriu Timor laran tomak, tanba vasina pertinente atu proteje sidadaun sira-nia vida husi ameasa Covid-19.(ant)