Diskumfia Sidadaun Ne’ebe Kapturado Iha Indonesia Estraga Fasilidade Saúde Iha Karantina Tasi-tolu

Smnewstl.com 25-08-2021 (Dili) — Diskonfia membru Grupu Arte Marsiais (GAM) ne’ebé foin dadauk autoridade Indonézia kaptura no halo deportasaun mai Timor-Leste, estraga fasilidade saúde nian iha fatin karantina tasi-tolu.

Akontesimentu ne’e akontese iha kuarta (25/08/21) kalan iha tuku 9, ne’ebé estraga fasilidade saúde hanesan, kama no mós odamatan haris fatin nian.

Komandante Polísia Munisípiu Dili, Superintendente Xefe Henrique da Costa informa, simu ona relatóriu verbal no eskrita husi komandu eskuádra sira, nune’e bainhira autór hirak ne’e kumpre ona periódu inkubasaun loron 14, maka Polísia Nasionál Timor-Leste (PNTL) sei loke investigasaun.

“Relatóriu husi ita-nia eskuádra tantu verbal ou eskritu ha’u simu ona, ita orienta komandante eskuádra no mós parte investigasaun, depois de sira kompleta 14 dias ita-nia prosesu investigasaun la’o, tanba agora sei iha karantina hela ita seidauk bele halo prosesu investigasaun,” dehan Superintendente Xefe, Henrique da Costa, iha knár fatin Komandu Polísia Munisípiu Dili, kinta ohin.

Henrique da Costa informa, fasilidade saúde ne’ebé autór sira estraga mak hanesan, kama ho haris fatin.

Nia hatutan, to’o oras ne’e, PNTL seidauk hatene ema na’in hira mak involve hodi harahun sasán hirak ne’e, tanba seidauk halo investigasaun, tanba sira sei iha hela karantina.

“Ida-ne’e horikalan akontesimentu ne’e mais ou menus iha tuku 9 bá leten, tuir informasaun ne’ebé mak ita hetan katak, kama ida, odamatan haris fatin ninian, maibé hakarak hatete katak, prosesu investigasaun la’o bá mak ita haree saida tan mak aat, sei iha hela prosesu nia laran depois mak ita bele hatene na’in hira mak involve,”

Insidente ne’e mós la rezulta pessoál saúde ne’ebé hala’o servisu iha karantina tasi-tolu mak kanek, maibé estraga de’it sasán.(ant)