CNRT Liderado Xanana Gusmao Hahú Halo Reestruturasaun Bá Estrutura

Smnewstl.com (Dili) — Partidu Congressu Nasionál Rekonstrusaun Timorense (CNRT), hahú halo reestruturasaun bá estrutura sub-nasionál iha territóriu Timor laran tomak, tanba mandatu estrutura anterior nian remata ona.

Hahu Sabado no Domingu ne’e (08/08/21) partidu CNRT realiza komferénsia sub-nasionál ne’ebé hala’o iha salaun Timor Lodge komoro, Dili, lidera diretamente husi Prezidente partidu CNRT, Kay Rala Xanana Gusmão ne’e, ho tema “Hamutuk Hametin Unidade Nasionál Asegura Estabilidade Nasaun Hodi Progressu Dezenvolvimentu bá Povu Timor-Leste”.

Objetivu husi komferénsia sub-nasionál ne’e, atu reestrutura iha postu administrativu Dom Aleixo, tanba atuál nia manda hotu ona, agora halo fali eleisaun bá estrutura foun hodi ka’er mandatu tinan lima, 2021 to’o 2025.

Nune’e, estrutura foun ne’ebé mai, atu servisu makas liután hodi lori vitória bá partidu CNRT iha eleisaun prezidensiál tinan 2022, no mós eleisaun parlamentár tinan 2023.

Komferénsia sub-nasionál ne’e hala’o durante loron ida, iha ne’ebé partisipante sira hamutuk 346 husi postu administrativu Dom Aleixo, munisípiu Dili, iha ne’ebé kompostu husi nurep 7.

Antes ne’e, iha loron Sábdu (07/08/21), Kay Rala Xanana Gusmão, hamutuk ho estrutura hala’o ona komferénsia sub-nasionál iha nível postu administrativu Cristu Rey munisípiu Dili, kompostu husi nurep 7 no selkom 56 ne’ebé halo iha salaun Canossa Becora.(**)