CESLINK Prienxe Ona Rekizitus Nu’udar Operadór Telekomunikasaun, Prontu Kompete Ho TT, Telkomcel no Telemor

Smnewstl.com 16-09-2021 (Dili) – Kompañia CESLINK prienxe ona rekizitus administrativa, tékniku no legál husi Autoridade Nasionál Komunikasaun (ANC) hanesan operadór telekomunikasaun bá dala-4 iha Timor-Leste.

Ministru Transporte Komunikasaun (MTK), José Agostinho da Silva informa ona bá Primeiru-Ministru, Taur Matan Ruak katak, kompañia operadór telekomunikasaun CESLINK prienxe ona rekizitus administrativu, rekizitus tékniku no legál no dekretu-lei n0. 13 artigus.

Tanba ne’e CESLINK bele hetan ona sertifikadu nu’udar operadór telekomunikasaun iha Timor-Leste hanesan mós operadór ejistente tolu hanesan, Timor Telecom, Telkomcel no Telemor.

“Sira-nia pedidu uluk aprezenta iha reuniaun konsellu ministru, membru konsellu ministrus sira halo apresiasaun no aprovasaun bá pedidu investimentu ida-ne’e. Agora sira kumpre hotu ona rekizitus, ha’u hato’o bá primeiru-ministru kompañia refere prienxe ona rekizitus administrativas, rekizitus téknikus no mós rekizitus legais, nune’e sira bele hetan sertifikadu rejistu nu’udar operadores telekomunikasoens daha’at iha Timor-Leste,” dehan Miistru José Agostinho Kinta ohin, iha rezidénsia PM Farol, Dili.

Maske operadór CESLINK prienxe rekizitus primeiru hodi hetan sertifikadu nu’udar operadór iha Timor-Leste, tanba ne’e faze daruak, CESLINK tenki kompleta tan rekizitus segundu kona-ba spec room inklui númeru telemóvel bá ANC.

“Etapa tuir mai, sira sei iha etapa segundu mak lisensa bá spec room no lisensa utilizasaun númeru telemóvel. Bá faze rua ne’e, kompañia CESLINK sei hatama fali sira-nia pedidu, nune’e ANC prosesu tuir dekretu-lei ne’ebé mak iha. Ne’ebé atribuisaun sertifikadu ida agora ne’e bá de’it rejistu nu’udar operadores telekomunikasoens,” afirma nia.

Nune’e, Ministru José Agostinho husu disponibilidade Primeiru-Ministru, Taur Matan Ruak nian, atu entrega hela sertifikadu refere bá operadór CESLINK, tanba investor sira-ne’e mesak timoroan de’it.

“Sira hotu nu’udar timoroan idade joven de’it, sira iha koñesimentu tékniku iha area ida-ne’e. Tanba ne’e mak ohin ha’u mai hato’o bá Primeir-Ministru no husu exelénsia nia disponibilidade par abele entrega sertifikadu ida-ne’e, tanba ne’e primeira-ves timoroan sira mak investe nu’udar operadores tekekomunikasoens, durante ita-nia operadores ejisténtes iha Timor Telecom, Telkomcel no mós Telemor,” subliña nia.

Antes ne’e, pedidu kompañia CESLINK hetan ona deliberasaun no aprovasaun husi husi konsellu ministru, maibé mosu problema internal iha CESLINK, nune’e difikulta prosesu rejistrasaun sira.(ant)