Benevides : Povu Hakarak Benefisiu Husi OJE 2022, Laos Hare Deit Osan Nia Naroman, Maibe Isin Povu La Hetan Ida

Smnewestl.com 03-12-21 (Dili) — Prezidente Bankada Partidu PUDD, Deputadu António Benevides transmite mensajen povu nian bá Primeiru-Ministru (PM), Taur Matan Ruak ho membru governu tomak katak, Orsamentu Jerál Estadu (OJE) tinan 2022 ho montante billiaun 1,675 labele de’it hanesan fatamorgana.

António esplika, fatamorgana katak, osan hanesan naroman ida-ne’ebé bele haree de’it liu husi matan, maibé nia isin lolon povu la haree.

“Primeiru-Ministru permite ha’u hato’o hela mensajen povu nian, povu husu ida de’it. Orsamentu ida-ne’e labele sai hanesan orsamentu fatamorgana katak, hanesan de’it naroman, bele haree liu husi matan, maibé isin lolon povu la hetan,” dehan Deputadu António Benevides iha intervensaun iha debate jeneralidade OJE 2022, iha plenária Parlamentu Nasionál (PN) Sesta-feira ne’e.

Nia hatutan, povu mós lakoi atu haree de’it orsamentu refere liu husi televizaun, no haree de’it nia montante husi jornál no Facebook, tanba fízika osan povu la ka’er no la sente. “Dala barak ita hotu-hotu temi dehan orsamentu atu tun bá bem star povu nian, maibé povu la hetan nia benefísiu,” afirma Benevides.

Mensajen povu bá daruak, Deputadu PUDD ne’e hatutan, atu dezenvolve nasaun, maka ema hotu presiza kontribui, labele haree de’it bá kór. “Labele importa katak, busa ne’e kór metan, kór mutin, kór verde, importante busa ne’e bele la’o, bele ka’er laho, kuandu nia laiha kapasidade ka’er laho ita-boot halot tiha busa ne’e Primeiru-Minsitru,” relata nia.

Nia realsa tan katak, komunidade sira husi Munisípiu Ainaru husu reprezentante povu ho membru governu sira atu labele fase liman beibeik, uza máskra, kria distánsiamentu sosiál demais entre ukun na’in ho povu sira, tanba prezensa deputadu ho membru governu sira maske la halo la halo milagre, maibé ho prezensa ne’e, bele lori mill alegrria bá komunidade sira.

Antes hakotu, reprezentante povu ne’e fundamenta, governu labele fase liman bebeik hodi hatudu sala ba ema seluk. Nia esplika, wainhira governu laiha kbiit atu halo buat ruma tenki asumi responsabilida hodi kontinua dun todan ba ema seluk.

Benevides husu atu governo labele subar oin iha masker laran maibe tenki hatudu karakter governu nian katak, Governu labele kria distansia sosial ho povu. Prezensa governo iha komunidade nia leet importante hodi kontinua dehan, maske lahalo milagre maibe ho prezensa iha povu nia leet sei lori mil alegria ba povu. (ant)