Benefisiáriu 243 Iha Suku Fatuhada Hahú Simu Osan Idozus

Smnewstl.com (Dili) — Benefisiáriu hamutuk 243 ne’ebé kompostu husi ferik no katuas inklui ema ho difisiensia sira, kinta-feira ne’e, hahú simu ona sira-nia osan idozus nian iha sede suku Fatuhada Postu Administrativu Dom Aleixo munisípiu Dili.

Ekipa husi Banku Nasionál Komérsiu Timor-Leste (BNCTL) hakat bá fahe subsídiu bá idozus no ema ho difisiensia sira iha suku Fatuhada, bazeia bá pedidu husi.

“Kona-ba idozus, idozas ne’e ohin dia 5 de Agostu pagamentu bá suku Fatuhada ninian, suku Fatuhada ne’e iha ferik ho katuas hamutuk 243 pessoas no alezadus i difisientes, hahú ohin dader hakarak ga la’e orsida tenki hotu, sé la to’o ita prolonga bá aban,” dehan Xefe Suku Fatuhada, Marcelino Soares, kinta (05/08/21) iha nia servisu suku Fatuhada.

Atu evita kontájiu surtu Covid-19 bá inan-aman sira no mós ema ho difisiensia, autoridade suku Fatuhada hato’o pedidu bá ekipa husi Banku Nasionál Komérsiu Timor-Leste (BNCTL) atu realiza de’it pagamentu iha suku.

“Aldeia lima selu hotu iha ne’e, tanba dala barak ita atu haruka sira bá iha ne’ebá, bá iha ne’ebá ne’e suku hotu-hotu tau hotu iha ne’ebá, entaun buat ida Covid-19 ne’e da’et kapás loos entaun ita mai iha ne’e separa tiha, suku Bairru-Pite ninia Covid-19 iha ne’ebá karik husik ninian mes-mesak labele mai fali Fatuhada,” tenik nia.

“Fatuhada ninia Covid-19 iha karik labele bá fali suku sira seluk, husik ninian mes-mesak iha ne’e par ita identifika loloos par tau serka sanitária karik, serka loos de’it ida-ne’ebé mak hetan Covid-19 makas liu, konfinamentu obrigatóriu dehan labele sai karik makas liu ona karik nia hela iha uma hela de’it iha uma Fatuhada ninian, labele bá fali iha Bairru-Pite, tanba ne’e mak ita evita mai fahe iha sede suku,” hatutan nia.

Entretantu, totál populasaun iha suku Fatuhada tuir dadus resenseamentu eleitorál iha tinan 2015 ne’ebé STAE publika iha tinan 2016, suku Fatuhada ho populasaun hamutuk rihun 18.

Maibé, dadauk ne’e posibilidade bele sa’e to’o rihun 20 ona, tanba prosesu resenseamentu sei la’o hela.(ant)