Baragem Tono La Fornese Be’e ba Natar, Autoridade RAEOA Nonok, Povu 100 Resin Ameasadu Hamlaha

Smnewstl.com 20-09-2021 (Dili)– Uma kain atus ida resin iha Suco Cunha, Sub Regiaun Pante Makasar dadaun ne’e ameasadu hamlaha kauza husi Baragem Tono, ne’ebe konstroi ho estado miliaun $11 lafunsiona hodi fornese be’e ba natar komunidade nian.

Ba jornalista Segunda-feira ne’e iha Suco Cunha, komunidade sira justifika, antes ne’e iha tinan kotuk fornesimentu be’e lao diak hela, maibe ba dadaun ne’e kuaze la funsiona kauza husi sedimentasaun (raihenek ne’ebe nakonu hodi taka netik be’e), nune’e implika ba natar komunidade sira nian.

“Agora tama ona faze daruak no fulan oin bele koileta ona, maibe ho kondisaun agora be’e ne’ebe laiha maka sei implika ba nia produsaun,” tenik Francusco da Cruz.

Nune’e mos Eduardo Mesquita informa, problema Baragem ne’e relata ona ba parte autoridade iha semana kotuk, maibe to’o oras ne’e seidauk iha intervensaun ruma,”nia relata.

Eduardo hatutan, karik problema ne’e la rezolve lalais maka sei fo ameasa ba komunidade sira ne’ebe maioria dependente ba vida agrikultor li-liu iha Suco Cunha.

Nia hein katak, liu husi informasaun ne’ebe transmite liu husi media nudar sira nia liman ain bele loke autoridade nia neon ho laran nune’e fo solusaun lalais.

“Ami fiar katak, liu husi informasaun ne’ebe ita bo’ot sira fo sai bele fanun bo’ot sira atu lalais rezolve hodi ami labele mate ba hamlaha,”nia kestiona

Ligado ba informasaun ne’e parte autoridade RAEOA seidauk aprezenta pozisaun ruma. Enkuanto populasaun nafatin hein intervensaun nune’e bele salva lalais sira nia natar hodi fo moris ba sira. (Rio)