Bancada Governo Defende Plataforma Entendimentu La ‘Naksobu’, Garante OJE 2022 Passa Iha Parlamento Nacional

Smnewstl.com 30-11-2021 (Dili) – Dadaun ne’e sai konsumu publiku ligado ho harmonia entre partido Politiku Fretilin liderado Marí Alkatiri, PLP liderado Taur Matan Ruak Atual Primeiro Ministro no Khunto liderado Jose dos Santos Naimori Bucar.

Tuir informasaun ne’ebe Smnewstl.com asesu komfirma, iha tendénsia boot plataforma entendimentu ameasado ‘naksobu’ nune’e sei afeta mós bá aprovasaun Orsamentu Jerál Estadu (OJE) tinan fiskál 2022.

Hata’an ba ida ne’e, deputadu sira husi bankada governu kompostu husi FRETILIN, PLP no KHUNTO defende katak, OJE 2022 sei pasa iha finál global nune’e konsidera informasaun hirak ne’ebe espalha hanesan propaganda baratu ne’ebe hakarak provoka situasaun hodi la kontribui ba estabilidade.

“Informasaun Plataforma atu naksobu ne’e, mai husi ema ne’ebé mak halo polítika bosok ten, tanba hakarak provoka situasaun. Ami Bancada governo metin, OJE 2022 sei pasa. Lalika fi’ar buat sira-ne’e, buat sira-ne’e halimar polítika nian,” afirma Deputadu David Dias Ximenes ‘Mandati’, iha PN Tersa-ne’e.

Sorin seluk, Deputada Bankada PLP, Regina Freitas rekuiñse, informasaun ne’ebé espalla, maibe defende katak, la afeita plataforma koligasaun. “Sim loos duni, maibé ita-boot sira lalika rona, akompaña de’it ami iha orsamentu jerál ne’e, ami fi’ar katak, sei la naksobu, tenki hadi’a para di’ak, mais atu naksobu parese la hanoin to’o iha ne’ebá ona,” dehan Deputada Regina.

Nia hatutan, nu’udar bankada apoiu governu mós nafatin halo krítika, bainhira ezekutivu halo laloos, maibé ne’e la signfika krítika atu afeta fali bá plataforma.

Nune’e mós Deputadu Bankada KHUNTO, António Nobre Tilman hateten, bankada KHUNTO mantein iha pozisaun no sei vota afavór bá OJE, nune’e bele hadi’a povu nia moris no rekupera fali ekonomia nasaun.

“Ami iha Parlamentu hala’o ami-nia funsaun nu’udar deputadu oinsá mak haree iha situasuan pandemia, oinsá mak ita atu rekupera ita-nia ekonomia liu husi OJE, tanba ne’e mak KHUNTO nia pozisaun klaru sei fó apoiu bá OJE 2022, tanba ami hola parte iha governu ami-nia pozisaun apoiu governu nia programa nia planu sira,” dehan António Nobre.

Entretantu, partidu FRETILIN, PLP no KHUNTO asina plataforma entendimentu iha loron 21 fulan Marsu tinan 2020, hodi viabiliza oitavu governu konstitusionál, hafoin OJE 2020 xumba iha PN, tanba bankada CNRT ne’ebé momentu ne’ebá apoiu governu, deside vota kontra bá OJE 2020.

Enkuanto, Orcamentu Geral Estado 2022 rasik sei hahu diskuti generalidade iha loron Kuarta-feira 01-12-2021, durante loron tolu, hafoin pasa ba espesialidade. (ant)