Autoridade Seguransa Klarifika ba Publiku Kazu Levi Gomes Nia Mate, 75% Oho A’an

Smnewstl.com 09-02-2022 (Dili) — Komandante Eskuádra Polísia Dom Aleixo Munisípiu Dili, Inspetór Assistente Américo Fátima konfirma, tuir observasaun temporáriu Polísia Nasionál Timor-Leste (PNTL) hatudu, 75% Levi Gomes mate oho a’an.

Inspetór Assistente Américo Fátima dehan, 25% ema oho, maibé Polísia Nasionál Timor-Leste (PNTL), bolu ona matebian Levi Gomes nia kaben no oan sira hodi halo bá identifikasaun.

Matebian Levi Gomes hakotu nia vida iha Tersa kalan loron (09/02/22), mais ou menus tuku 8 kalan iha nia uma Bebonuk aldeia 20 de Setembru, tanba lori tudik sona iha parte kakorok.

Inspetór Assistente Américo Fátima hatutan, iha Tersa lokraik, matebian mak kadi tudik ida dehan atu uza bá kua-modo, maibé iha tuku 8 kalan matebian uza tudik ne’e kua nia kakorok hodi hakotu iis.

“Lokraik ne’e nia rasik mak kadi tudik ne’e, nia família sira dehan atu uza bá kua-modo nia dehan, husik ha’u mak kadi par kroat, ne’e mak nia rasik mak kadi tudik ne’e halo kroat tiha, depois fali kalan akontesimentu iha 8 oras, vítima kua nia kakorok iha fatin luhan, fatin akontesimentu ne’e Bebonuk aldeia 20 de Setembru besik eskola, ami to’o ema ne’e mate kedas iha fatin, ita evakua bá ospitál par halo otopsia,” dehan Inspetór Assistente Américo Fátima, iha salaun City 8 Manleuana, Dili, kuarta ne’e.

Nia hatutan, tuir observasaun temporáriu PNTL eskuádra Dom Aleixo nian katak, 75% mak matebian mate oho aan, enkuantu 25% sei diskonfia hela.

“Maibé ami-nia indikasaun ne’e katak, ami-nia observasaun temporáriu bá iha mate ne’e katak, kuaze 75% ne’e nia oho aan, 25% ami sei diskonfia, tanba laiha indikasaun uza forsa, laiha indikasaun sasán ruma aat, laiha ema ruma halo ofensa bá nia,” subliña nia.

Inspetór Assistente ne’e haktuir, antes ne’e, matebian Levi Gomes istori malu ho nia ferik oan, inklui matebian mós sofre hela moras seluk.

Américo Fátima informa, moras ne’ebé vítima iha seidauk identifika, tanba sei iha hela prosesu otopsia.

Matebian Levi Gomes dadauk ne’e servisu iha jornál Timor Post hanesan sirkulasaun jornál.(ant)