Asosiasaun 14 Submete Ona Mosaun Sensura Bá FIFA ho AFC, Lakon Konfiansa ba Francisco Jerónimo 

Smnewstl.com 17-01-2022 (Dili) — Asosiasaun futeból 14 husi Munisípiu sira hato’o ona mosaun sensura bá FIFA ho AFC hodi husu Francisco Jerónimo demite aan husi kargu nu’udar Prezidente Federasaun Futeból Timor-Leste (FFTL), tanba lakon ona konfiansa ba executivo ne’e.

Porta-voz Asosiasaun Futeból, Aleixo de Carvalho Monteiro esklarese, rajaun hato’o mosaun sensura bá FIFA ho AFC ligadu ho kazu ne’ebé akontese iha FFTL tinan kotuk. Aelixo haktuir, Francisco Jerónimo eleitu bá Prezidente FFTL, tanba hetan konfiansa husi asosiasaun 14 husi Munisípiu sira.

“Agora dadauk karta mosaun sensura manda ona bá FIFA no AFC katak, durante señór Prezidente Francisco Jerónimo lidera FFTL ne’e asosiasaun sira mak fó fi’ar, mais iha situasuan agora daduak ne’e, asosiasaun sira lakon ona konfiansa bá nia,” dehan Porta-voz Asosiasaun Futeból, Aleixo de Carvalho Monteiro, liu husi komferénsia imprensa iha Sede Asosiasaun Futeból Dili Oeste Kampu Alor, Dili, Tersa-feira ne’e.

Porta-voz Asosiasaun Futeból 14 ne’e mós husu komisaun verifikasaun eleitorál atu verifika didi’ak lista kandidatura bá Prezidente FFTL nain tolu ne’ebé submete ona inklui Prezidente atuál ba kongresu kongressu ne’ebé sei hala’o iha tempu badak.

Nia esplika, tuir regras FIFA nian katak, atuál Prezidente FFTL ne’ebé lakon ona konfiansa husi asosiasaun sira, labele re-kandidata tan iha kongresu bá periódu 2022-2027.

“Ida-ne’e mak lakon konfiansa bá nia, serake regras FIFA nian ne’e labele ona, tanba ho señór Jerónimo re-kandidatu ne’e, tanba ne’e, asosiasaun sira ejize bá komisaun verifikasaun eleitorál atu verifika didi’ak dadus kandidatu na’in tolu ne’ebé agora daduak eleitu ne’e liu-liu señór Jerónimo nia kandidatu ne’e,” subliña nia.

Nia hatutan, FIFA fó ona resposta bá mosaun sensura ne’ebé asosiasaun sira haruka bá FIFA no AFC katak, Prezidente FFTL, Francisco Jerónimo labele atu re-kandidata iha kongressu FFTL ne’e.

“FIFA mós fó ona sinál ida mai FFTL. Sinál ne’e mak mosaun sensura ne’e katak, lakon konfiansa bá nia, tanba Prezidente FFTL ne’e tenki hili husi asosiasaun sira. Sé asosiasaun sira haruka ona karta mosaun sensura bá FIFA, signfika nia laiha direitu ona,” tenik nia.

Maibé Porta-voz Asosiasaun Futeból ne’e rekuiñse, durante mandatu Prezidente FFTL, Francisco Jerónimo nian, dezenvolvimentu futeból iha Timor-Leste konsege la’o, maibé buat balun mós la la’o.

Sorin seluk, Deputy FFTL, Frederico Martins hateten, sábdu semana kotuk maka komité eleitorál halo verifikasaun ikus bá lista kandidatura sira-nian ne’ebé loke iha dia 5 to’o dia 12 Janeiru foin lalais ne’e, nune’e kuandu iha reklamasaun ruma, proponente sira bele halo rekursu bá komité eleitorál.

Maibé Frederico Martins konfirma, to’o agora, Sekretariadu Jerál Federasaun no komité eleitorál seidauk simu rekursu ruma husi membru ezekutivu ho asosiasaun sira.

“Iha dia 5 to’o dia 12 mós ita loke atu karik proponente sira husi kandidatura sira karik sira iha kestaun ruma iha rekursu ruma, sira bele hato’o mak iha komité bá iha eleisaun nian, maibé hanesan Sekretariadu Jerál Federasaun nian, ate agora ami seidauk simu karta ida husi proponte sira kona-ba assuntu ida-ne’e,” dehan Frederico Martins.

Frederico Martins mós rekuiñse, simu karta balun ne’ebé membru ezekutivu ho asosiasaun sira haruka bá FIFA no AFC. Maibé, kona-ba mosaun sensura ligadu ho kazu ne’ebé akontese tinan kotuk iha FFTL, FIFA, AFC no AFF seidauk fó resposta klaru nune’e prefere lori bá diskuti iha kongressu FFTL nian.

Alem de ne’e, FIFA, AFC no AFF mós konsidera, kazu ne’e problema interna FFTL nian, no kabe bá kompeténsia Prezidente FFTL atu rezolve.

“Sira-nia pozisaun iha klaran, sira lakoi interven buat ne’ebé akontese iha federasaun sira konsidera katak, ne’e problema internal federasaun, no sira husik bá federasaun no Prezidente atu bele haree kestaun ida-ne’e,” hakotu nia.

Ba mosaun sensura ne’e rasik, Presidente Federasaun Futebol Timor Leste, Francisco Jeronimo seidauk aprezenta pozisaun. (ant)