APORTIL Termina Ona Distinu Ró Tranship II

Smnewstl.com (Dili) — Autoridade Portuáriu Timor-Leste (APORTIL), deside la extende ona kontratu ró Tranship II hodi halo operasaun husi Dili bá Oe-cusse no Dili Ataúro.

Prezidente Konsellu Administrasaun APORTIL, Flávio Cardoso Neves justifika, rajaun APORTIL notifika hodi hapara operasaun ró Tranship II iha Timor-Leste, tanba kontratu entre governu Timor-Leste ho ró Tranship II durante fulan rua ne’e remata ona iha loron 21 fulan-Jullu tinan 2021, tanba ne’e APORTIL laiha ona orsamentu atu extende kontratu bá fulan ida tan.

“Tantu iha fulan primeiru fulan segundu halo tiha ona, atu bá fulan terseiru ha’u hanoin ita orsamentu mós laiha, APORTIL mós laiha orsamentu preparadu para atu aluga ró ida bá to’o fulan tolu, tanba ne’e mak hanesan prezidente APORTIL, ha’u halo notifikasaun bá iha ró Tranship atu bele para halo nia operasaun, tanba kontratu mós pas hotu, kontratu hotu iha dia 21 de Jullu fulan rua,” informa Prezidente APORTIL, Flávio Neves bá Smnewstl.com sesta (30/07/21) iha nia servisu Portu, Dili.

Prezidente APORTIL afirma, sira deside hapara la extende kontratu ró Tranship II la’ós tanba preukupasaun husi komunidade Oe-cusse no Ataúro inklui públiku nian.

Maibé, APORTIL hapara, tanba laiha ona orsamentu atu kontinua aluga ró refere.

“Ida-ne’e ema bele preukuka, mais APORTIL nia knár mak ne’e, sé orsamentu laiha APORTIL sei la kontinua, ita hotu tenki hatene katak, ró Tranship II mai ne’e atu substitui ró Nakroma ho susesu prepara hela kondisaun atu bá halo manutensaun, tanba ne’e mak ita presiza ró substitui atu bele garante nafatin movimentu bá Ataúro ho Oe-cusse, agora preukupasaun ema nian, ha’u dehan ne’e direitu ema ida-idak nian,” dehan Flávio.

Flávio Neves haktuir, foin lalais ne’e, governu liu husi Ministériu Transporte Komunikasaun (MTK) deside aluga ró Tranship II ne’e atu substitui ró Nakroma ne’ebé avaria hela no seidauk halo manutensaun, inklui ró susesu ne’ebé iha hela prosesu atu bá halo manutensaun.

“Ita-nia ró Tranship ne’e ró ida aluga, tanba ita-nia ró Nakroma iha prosesu hela oinsá mak atu halo manutensaun, depois mós ró susesu mós prepara hela kondisaun atu hanusa mak bá halo manutensaun, tanba ne’e mak horbainhira ita hatama ró Tranship substitui atu bele garante nafatin konektividade Oe-cusse, Ataúro la’o nafatin,” dehan nia.

Flávio Neves hatutan, maske hapara ona kontratu ró Tranship II, maibé governu sei la aluga ona ró susesu, tanba ró refere hela ona prosesu preparasaun atu bá halo manutensaun iha li’ur.

Tanba ne’e, APORTIL iha ona alternativu atu substitui ró Tranship II hodi garante nafatin konektividade entre Dili Oe-cusse no Dili Ataúro, maka ró Ataúro Express no ró Samudra 8 ne’ebé espesífiku tula de’it kargo.

“Ita hotu hatene muito bem, ró susesu iha ona prosesu preparasaun atu bá halo manutensaun, tanba ne’e mak ha’u hanoin orsida ita tenki koordena ho DNTM atu haree ida, mais ita mós iha rekursu seluk ne’ebé mak ita bele utiliza hanesan Ataúro Express, hanesan Samudra hodi garante nafatin movimentu ou konektividade illa rua ne’e,” tenki nia.

Maske ró Ataúro Express ki’ik ne’ebé labele tula pasajeirus barak, Flávio afirma, APORTIL sei kria regra ida, nune’e bele limita atu labele tula pasajeirus barak liu kapasidade ró nian.

Entretantu, governu liu husi MTK kontratu ró Tranship II durante fulan rua hahú iha loron 21 fulan-Maiu to’o loron 21 fulan-Jullu tinan 2021 hodi mantein konektividade entre Dili ba Oe-cusse no Dili Ataúro.

Nune’e, kada fulan governu selu ho osan hamutuk dólar rihun $ 220, no fulan rua ne’e ezekutivu selu ona orsamentu ho montante rihun $ 440.(ant)