Amorim : Prosesu Resenseamentu Eleisaun Ho Atualizasaun Baze Dadus Iha Diáspora Iha Fallansu Tékniku

Smnewstl.com 14-10-2021 (Dili) – Ekipa integrada ne’ebé bá halo prosesu resenseamentu eleitorál no mós atualizasaun baze dadus bá timoroan sira iha rai li’ur rekuiñe iha duni fallansu tékniku balun durante prosesu resenseamentu bá timoroan sira iha li’ur.

Ekipa integrada ha’at ne’e kompostu husi Ministériu Negósiu Estranjeiru no Koperasaun (MNEK), Sekretariadu Tékniku Administrasaun Eleitorál (STAE), Komisaun Nasionál Eleisoens (CNE) no Ministériu Justisa liu husi Diresaun Nasionál Rejístu Notariádu (DNRN).

Ekipa integrada ne’e desloka ona bá nasaun tolu hanesan, Corea do Súl, Portugál no Reinu Unidu iha loron 1 fulan Outubru liu bá, hodi halo resenseamentu eleitorál no atualizasaun baze dadus bá timoroan sira ne’ebé hela no balun servisu.

Lamentasaun ne’ebé sidadaun timoroan sira ne’ebé hela no servisu iha li’ur nian mak, sira kestiona kona-ba prosesu atendimentu husi ekipa tékniku ne’ebé limitadu no mós espasu embaixada Timor-Leste nian iha li’ur ne’ebé klot, nune’e implika bá sira-nia servisu.

Tanba ne’e, Diretór Jerál Assuntus Protokolares no Konsulares MNEK, José António Amorim Dias rekuiñese, iha duni lamentasaun husi sidadaun sira, relasiona ho oráriu atendimentu husi tékniku ekipa konjunta nian, inklui mós espasu embaixada ne’ebé klot.

Maibé, Diretór Jerál ne’e afirma, prosesu resenseamentu eleitorál husi ekipa konjunta ne’e, primeira ves realiza iha diáspora, tanba ne’e, hasoru mós dezafiu lubuk ida, tanba prosesu resenseamentu ne’e hala’o iha tempu pandemia Covid-19 nia laran, tanba ne’e husu sidadaun sira-nia komprensaun.

“Ita-nia embaixadas iha rai tolu ne’e, halo esforsu ajuda makas par ita-nia tékniku sira bele hala’o servisu di’ak liután. Inglaterra iha difikuldade balun ne’ebé ita-nia populasaun iha ne’ebá mós reklama katak, iha ita-nia embaixada fatin ladún di’ak, ladún boot no luan par bele akolla sira hotu, ita tenki komprende,” dehan Diretór Jerál Assuntu Protokolares no Konsulares, José Amorim Dias, liu husi komferénsia imprensa iha MNEK Pantai-kelapa, Dili. Kinta ohin.

Maske hasoru difikuldade, maibé prosesu resenseamentu eleitorál no atualizasaun baze dadus la’o di’ak, tanba hetan apoiu makas husi funsionáriu diplomata sira iha li’ur.

Nia hatutan, ekipa konjunta seidauk bele desloka bá Austrália hodi halo resenseamentu eleitorál, tanba Austrália iha hela konfinamentu obrigatóriu (lockdown) nia laran.

“MNEK atraves de ita-nia embaixada sira iha li’ur, nestemomentu ita hakarak realiza iha rai 4 ne’e, Austrália, Portugál, Corea do Súl ho Inglaterra, mais como Austrália sei lockdown, ita seidauk komesa, maibé ita hala’o dadauk ona iha Portugál, Corea do Súl ho Inglaterra,” tenik nia.

Sorin seluk, Diretór Jerál STAE, Acilino Manuel Branco konfirma, maske hasoru dezafiu, maibé hafoin ekipa tékniku, durante loron 10 nia laran, halo kedas resenseamentu eleitorál no atualizasaun baze bá timoroan sira.

“Hanesan Corea do Súl halo kedas formasaun i kontinua halo kedas atendimentu bá ita-nia sidadaun timoroan sira iha ne’ebá, prosesu hotu la’o di’ak, hetan partisipasaun ne’ebé mak makas husi ita-nia sidadaun timoroan sira iha ne’ebá barak sidadaun traballadores ne’ebé hala’o knár iha ne’ebá, sira mai rejístu sira-nian, barak liu bá atualiza sira-nia kartaun eleitorál,” informa nia.

Nia hatutan, iha Corea do Súl, semana ne’e nia laran, ekipa tékniku sei halo rejístu móvel bá timoroan sira iha sidade Guan Zu, tanba maioria sidadaun barak mak hela iha Guan Zu.

Iha Portugál ho Reinu Unidu, Acilino Manuel Branco subliña, nasaun rua prosesu resenseamentu eleitorál la’o di’ak, no hetan partisipasaun makas husi sidadaun sira.

“Iha Portugál laiha problema, atendimentu la’o di’ak teb-tebes, tékniku sira mós halo preparasaun atu bele halo atendimentu iha Portu tuir rezolusaun governu ne’ebé mak iha. Iha Reinu Unidu tuir informasaun katak, timoroan mak hela iha ne’ebá, tanba iha rezolusaun governu aprova hodi halo atendimentu alem de iha ita-nia embaixada, sei halo mós atendimentu móvel iha sidade tolu,” afirma nia.

Entretantu, totál eleitór ne’ebé rejistu no atualiza iha baze dadus STAE nian iha estranjeiru hamutuk 367, ne’ebé kompostu husi nasaun tolu hanesan, Portugal eleitór foun 1, eleitór ne’ebé atualiza 19. Corea do Súl totál eleitór foun 3, eleitór ne’ebé atualiza kartaun eleitorál 289 no Reino Unido eleitór foun 12, eleitór ne’ebé atualiza 43.

Alem ne’e, tuir rezolusaun governu m0.105/2021 11 Agostu deside atu halo resensementu eleitorál no atualizasaun baze dadus iha diáspora, liu-liu iha nasaun 4 hanesan, Austrália, Portugá, Corea do Súl no Reino Unido.(ant)