Smnewstl.com -Primeiru-Ministru (PM), Kay Rala Xanana Gusmão hala’o lansamentu bá konstrusaun eskema Irrigasaun Maliana II, iha suku Tapo-Memo, postu administrativu Maliana, munisípiu Bobonaro, sesta (10/01/2025).
Primeiru-Ministru husu bá kontratór atu halo obra ne’e ho kualidade no husu mós bá entidade hotu-hotu atu halo kontrolu no tenke kurize bainhira kualidade la di’ak tanba ne’e parte importante ida atu dezenvolve seitór produtivu iha área rurál.
Governu Timor-Leste liu-hosi Ministériu Agrikultura, Pakuária, Peska no Floresta (MAPPF) halo konstrusaun bá obra ne’e iha fatin ne’ebé antes ne’e Governu Portugés konstrui ona irrigasaun kuaze iha tinan 1984.
“Husu bá kompañia, AND no ema sira ne’e hotu atu tau-matan hodi halo obra ne’e tenke ho kualidade tanba iha obra barak mak bainhira udan mai lori hotu bá para iha tasi laran. Tenke orienta servisu nune’e halo ho di’ak no kualidade tanba obra ne’e iha kedan mota ninin. Husu entidade hotu-hotu atu fó apoiu ho hanoin no korresaun,” PM Xanana hateten iha diskursu.
Xefe Governu iha esperansa katak, ho konstrusaun irrigasaun ida-ne’e bele sunu liu-tán Bobonaro-oan atu badinas liu-tan hodi servisu, nune’e iha futuru redús duni importasaun fos hosi rai-liur.
Kay Rala Xanana Gusmão dezafia joven Bobonaro oan atu badinas halo servisu no tenke hadi’a mentalidade atu la’ós de’it eskola hodi servisu iha instituisaun Estadu, maibé oinsa uza matenek ne’ebé iha hodi dezenvolve rekursu ka área produtivu sira mak hanesan natar hodi hetan hare barak liu-tán no bele esporta bá rai liur.
Iha fatin hanesan, Ministru Agrikultura, Pakuária, Peska no Floresta, Marcos da Cruz agradese bá entidade hotu-hotu ne’ebé kontribui ona bá prosesu tomak to’o lansamentu konstrusaun eskema irrigasaun Maliana II.
Marcos da Cruz husu bá entidade hotu-hotu atu servisu hamutuk nune’e konstrusaun ne’e iha duni kualidade no konklui tuir tempu ne’ebé mak iha.
Nune’e mós Prezidente Autoridade Munsípiu Bobonaro, Alexandre Pires agradese tanba Governu sentrál deside hodi halo konstrusaun bá Irrigasaun Maliana II ne’ebé sei lori benefísiu bá natar hektares 1.100 ne’ebé abandonadu durante tempu naruk nia laran.
Tuir dadus, durante ne’e populasaun agrikultór iha Bobonaro prodús hare kada tinan ho kuantidade ne’ebé kiik tebes kuaze tonelada 20 de’it, maibé iha ona esperansa katak, ho kontrusaun ida-ne’e sei bele aumenta liu-tán produsaun.
Alexandre Pires agradese bá Ministru Marcos da Cruz tanba uluk agrikultór sira iha Bobonaro kuda no ko’a hare ho sistema tradisionál maibé ohin loron, ho sistema modernu tanba Ministériu distribui ona mákina kompletu.
“Ida-ne’e ajuda tebtebes populasaun agrikultór sira liu-liu redús ona sira-nia tempu servisu ne’ebé lais-liu kompara ho sistema tardsionál,” nia hateten.
Projetu ne’e ho naran Eskema Irrigasaun Maliana II, ho númeru kontratu Tender/003/MAPPF-2024, ho orsamentu bá projetu ne’e hamutuk $9,886,820,81.
Kontratór bá obra ne’e maka PT. Minarta Dutahutama, Konsultan maka PT. Caturbina Guna Persada TV no PT. Mutimera Harapan ho data kontratu hahú iha 28 Outubru 2024 ho durasaun fulan 30.
Partisipa iha serimónia lansamentu ne’e maka, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, Ministru Defeza, Donaciano do Rosário Gomes, Ministru Planeamentu no Investimentu Estratéjiku, Gastão Francisco de Sousa, Sekretáriu Estadu Peskas, Domingos da Conceição dos Santos, Sekretáriu Estadu Pekuária, José Vieira de Araújo, Sekretáriu Estadu Florestas, Fernandinho Vieira, Embaixadór Repúblika Indonézia iha Timor-Leste, Okto Dorinus Manik, Deputadu sira hosi Parlamentu Nasionál, Xefe Bankada FRETILIN iha Parlamentu Nasionál, Aniceto Guterres Lopes hanesan Bobonaro-oan ne’ebé iha koversa amigável tebes ho Primeiru-Ministru, Autoridade munisipál, autoridade lokál, reprezentante kompañia kontratór, populasaun agrikultór Bobonaro no konvidadu sira.(*/Smnews)
Komentariu