Smnewstl.com – Ministra Edukasaun Dulce de Jesus elojia apoiu husi Embaixada Japaun hodi promove kultura local no edukasaun iha Timor-Leste.
Durante asinatura projetu “Grant Assistance for Cultural Grassroot Project (GCGP) liu husi Embaixada Japaun no Sala Leitura Xanana Gusmão hodi apoiu halo renovasaun ba edifísiu sira atu bele ajuda estudante sira estuda no peskiza, Dulce de Jesus ne’ebé hanesan mos membru konsellu Sala leitura defende importansia promove kultural.
“Ha’u sempre haraik-an hodi sai sasin komprimísiu no dedikasaun ne’ebé Sala Leitura Xanana Gusmão ho Grant Assistance for Cultural Grassroot Project (GCGP) Japaun, hatudu liu husi sira nia esforsu kolaborativu atu konserva no promove kultura lokál no edukasaun iha Timor-Leste”, dehan Ministra Edukasaun.
Iha fatin hanesan, Embaixadór Japaun Tetsuya KIMURA hateten, Governu konstitusionál da-9 Timor-Leste nian tau importásia ba edukasaun ho kualidade di’ak liu ne’ebé asesivel ba ema hotu, tanba ne’e hamutuk hodi reitera hikas importánsia husi halakon desekilíbriu edukativu no oferese edukasaun ho kualidade ba ema hotu.
“Permite ha’u hodi hato’o parabens ba Sala Leitura Xanana Gusmão ne’ebé selesionadu hodi simu asisténsia husi fundu GCGP ba tinan ida ne’e, ne’ebé refleta imi nia entusiazmu hodi melloria ambiente edukasionál no kultura ba labarik foinsa’e sira iha Timor-Leste “, dehan Embaixadór Japaun.
Projetu ne’ebé iha atu halo renovasaun ba Uma-Mahon, biblioteka, sentru expozisoens, pavimentu, parede liur, moru protesaun, raga livru foun, meza ba komputadór, armáriu no ekipamentu nesesáriu sira seluk.(SMNews)
Komentariu