Smnewstl.com 27-11-2021 (Laclo) – Sekretariadu Apoiu Maun Boot Kay Rala Xanana Gusmão lideradu Tomas Cabral fó apoiu nesesidade bázika bá komunidade aldeia 5 iha Postu Administrativu Laclo Munisípiu Manatuto hodi selebra loron Proklamasaun Independénsia 28 Novembru bá dala-46.
Koordenadór Sekretariadu, Tomas Cabral informa, molok desloka bá estranjeiru, Kay Rala Xanana Gusmão orienta sira atu lori hela ai-han bázika bá komunidade sira iha áreas remotas, estudante universitáriu ne’ebé hala’o estájiu iha Postu Administrativu Laleia, no mós Padre ho madre sira.
“Antes atu sai bá rai li’ur, fó hela nia apoiu ne’ebé ami sei hato’o bá komunidade sira iha remotas liu-liu bá komemorasaun 28 Novembru, fó mós apoiu bá universidade sira estájiu iha Laleia, madre sira iha Manatuto, Padre sira iha Metinaro ho apoiu bá postu administrativu Laclo iha aldeia 5 iha áreas remotas,” dehan Tomas Cabral, hafoin distribui ai-han bázika iha Postu Laclo Munisípiu Manatuto, sábdu ne’e.
Atuál terseiru Vise Prezidente Partidu CNRT ne’e hatutan, apoiu hirak ne’e mai direta husi Líder Karismátiku, Kay Rala Xanana Gusmão bá komunidade sira iha área rurál.
“Apoiu ne’e Maun Boot nian, ami só mai hatutan de’it apoiu ne’ebé Maun Boot entrega bá komunidade sira. Iha fo’os, Supermi, iha Manu-tolun no mina iha fatin ne’ebé presiza liu,” dehan nia.
Sorin seluk, Xefe Aldeia Labubo, Luís Mendonça lori komunidade Aldeia 5 nia naran agradese bá Líder Karismátiku, Kay Rala Xanana Gusmão, tanba bele fó apoiu nesessidade bázika bá sira.
Luís afirma, apoiu ne’e sira la haree bá oituan ga barak, maibé, Xanana Gusmão hanesan aman bá nasaun, iha duni responsabilidade bá nia povu sira ne’ebé hela iha área izoladu.
“Ha’u em-nome komunidade aldeia sente orgullu tebes, no hato’o mós orgullu komunidade nian, ami sente katak, durante dia 4 Abríl akontesimentu nafatin hanesan aman bá nasaun ida-ne’e, iha vontade di’ak nafatin no iha responsabilidade nafatin bá povu ki’ak no kbiit la’ek sira,” dehan Luís Mendonça.
Maski prezensa Líder Karismátiku, Kay Rala Xanana Gusmão nian laiha, maibé, liu husi apoiu ne’ebé fó hatudu katak, Xanana iha duni responsabilidade bá nia povu rasik.
Entretantu, apoiu nesessidade bázika ne’ebé Líder Karismátiku, Kay Rala Xanana Gusmão oferese bá komunidade aldeia 5 iha Postu Administrativu Laclo Munisípiu Manatuto mak hanesan, fo’os, Supermi, mina, Manu-tolun no seluk tan.
Alem de ne’e, Kay Rala Xanana Gusmão mós fó apoiu tanki bee-moos bá Parókia Igreja Matinaro, inklui fó apoiu mós ai-han nesessidade bázika estudante sira-ne’ebé hala’o estájiu iha Postu Administrativu Laleia no mós Madre sira iha Manatuto.(ant)
Komentariu