SMnewstl.com | Dili, 06 Novembru 2026 – “Timor-Leste sei hela nafatin iha ha’u-nia fuan no ha’u sei la haluha esperiénsia furak ida-ne’e.” Liafuan ne’e sai hanesan mensajen emosionál husi Embaixadora Austrália iha Timor-Leste, Caitlin Wilson, bainhira hala’o enkontru despedida ho Primeiru-Ministru (PM), Kay Rala Xanana Gusmão, iha Palásiu Governu Dili.

Enkontru ne’e marka rohan ba mandatu diplomátiku Caitlin Wilson,ne’ebé dura tinan tolu-resin iha Timor-Leste. Durante períodu ne’e, nia hala’o knaar diplomátiku atu hametin relasaun amizade no kooperasaun bilateral entre Austrália no Timor-Leste.

Wilson hato’o sentimentu onra no priviléjiu tanba hetan oportunidade atu servisu hamutuk ho Primeiru-Ministru Xanana Gusmão no Governu Konstitusionál durante nia mandatu. Nia konsidera períodu ne’e hanesan tempu importante tebes ba dezenvolvimentu relasaun entre nasaun rua.

Iha kooperasaun bilateral, Wilson mós destaka progresu iha projetu estratéjiku importante sira, inklui Greater Sunrise, ne’ebé sai parte ida husi ajenda kooperasaun entre Austrália no Timor-Leste, hamutuk ho área seluk ne’ebé nasaun rua kontinua promove.

“Ha’u-nia enkontru despedida ikus ho Primeiru-Ministru, Kay Rala Xanana Gusmão, ha’u-nia mandatu tinan-tolu ho balun iha Timor-Leste. Ida-ne’e sai hanesan períodu importante tebes iha relasaun entre Austrália no Timor-Leste,” Caitlin Wilson hateten.

Maski sei sai husi Timor-Leste, Wilson hato’o katak nia sente triste atu husik nasaun ida-ne’e, tanba esperiénsia no relasaun ne’ebé nia harii durante nia mandatu sei kontinua sai parte importante iha nia memória.

“To’o ona tempu bá ha’u atu hakat ba ha’u-nia kapítulu tuirmai. Ha’u mós triste tebes atu sai. Timor-Leste sei hela nafatin iha ha’u-nia fuan. Ha’u sei la haluha Timor-Leste no esperiénsia furak ida-ne’e,” nia espresa.

Embaixadora Caitlin Wilson sei remata ofisialmente nia misaun diplomátika iha Timor-Leste iha loron 13 Novembru 2026, hafoin servisu durante tinan tolu-resin. Maski nia mandatu diplomátiku to’o ona rohan, amizade no relasaun kooperasaun entre Austrália no Timor-Leste sei kontinua sai elementu importante ba futuru relasaun bilateral entre nasaun rua.