Smnews.com | Dili, 05 Novembru 2026 – Dezenvolvimentu infraestrutura urbana iha kapitál Dili kontinua sai prioridade ba Governu, liuliu iha esforsu atu hadi’a sistema tráfiku, hamenus engarafamentu no fasilita mobilidade ba públiku. Maibé, iha sorin seluk, projetu alargamentu estrada husi Bidau Akadiru to’o Maskarinhas sei lori mudansa boot ba komunidade, tanba uma-kain hamutuk 150 sei hetan impaktu direta husi projetu ne’e.
Governu, liuhusi Sekretaria Estadu Asuntu Toponímia no Organizasaun Urbana (SEATOU), hamutuk ho Ministériu Obras Públikas (MOP), agora prepara hela prosesu despezu administrativu ba uma-kain sira ne’ebé propriedade tama iha área ne’ebé sei uza ba alargamentu estrada.
Sekretáriu Estadu Asuntu Toponímia no Organizasaun Urbana, Germano Santa Brites, esplika katak,área projetu ne’e hahú husi Ponte Toko Baru, besik ospitál, kontinua to’o edifísiu EDTL, E.P. iha Kolmera, no husi ne’ebá to’o Maskarinhas, ne’ebé iha baliza ho área Balide.
Total uma-kain 150 ne’ebé sei hetan impaktu inklui komunidade iha Kaikoli no Maskarinhas. SEATOU antes ne’e hala’o ona sosializasaun ho komunidade sira atu fó hatene kona-ba projetu no mudansa ne’ebé sei akontese iha sira-nia área hela-fatin.
La’ós de’it área Bidau to’o Maskarinhas, Governu mós planeia kontinua alargamentu iha área Kintal Bot to’o Eskola EPB no Ponte Maufelu. Iha Ponte Maufelu, Governu sei fó prioridade ba konstrusaun rotunda, ho objetivu atu hadi’a organizasaun tráfiku no hamenus engarafamentu ne’ebé durante ne’e sai dezafiu ba utilizadór estrada sira iha Dili.
Maski nune’e, ba komunidade afetadu sira, projetu ne’e signifika katak sira presiza prepara an atu hasai sasán no propriedade husi área ne’ebé sei tama ba konstrusaun. Komunidade sira agora hein hela ekipa téknika husi MOP no SEATOU atu halo levantamentu no identifika propriedade sira ne’ebé sei hetan impaktu.
Governu mós sei hahú prepara prosesu tama ba área Matadouro iha semana ida-ne’e. Ekipa téknika sei rekolla dadus no halo levantamentu kona-ba área afetadu, antes hein orientasaun no desizaun husi Ministru Obras Públikas atu fó dalan ba kompania sira ne’ebé hetan kontratu hodi hahú hala’o obra.
Germano Santa Brites hateten katak,prosesu despezu administrativu ne’e sei aplika ba propriedade sira ne’ebé tama iha área rai Estadu no hetan impaktu direta husi projetu. Aleinde propriedade, ekipa relevante sira sei haree mós ba infraestrutura eletrisidade, inklui transformadór no kabu eletrisidade sira ne’ebé presiza muda husi liña aas ba rai-okos, atu la impede prosesu konstrusaun.
Iha sorin seluk, SEATOU apresia atitude kooperasaun husi komunidade, liuliu sira ne’ebé hela iha área Matadouro, tanba sira hatudu prontidaun atu koopera no akompaña ekipa téknika durante prosesu levantamentu.
“Benvindu ba dezenvolvimentu. Ita hasai sasán sira ne’e la’ós ba interese pesoál, maibé ba interese komún, atu dezenvolve ita-nia cidade no hadi’a kondisaun tráfiku ba komunidade hotu,” Germano Santa Brites afirma.
Projetu alargamentu estrada ne’e,agora tama ona iha faze preparasaun administrativu no téknika. Maski objetivu prinsipál mak hadi’a infraestrutura no mobilidade urbana, komunidade afetadu hamutuk 150 sei sai parte importante husi prosesu mudansa ne’e. Tanba ne’e, transparénsia, komunikasaun no klaridade kona-ba direitu propriedade no mekanizmu kompensasaun, se aplika, sei importante atu garante katak dezenvolvimentu cidade la husik komunidade afetadu sira iha incerteza.
Komentariu