Smnewstl.com | Liquiçá,25 Outubru 2026- Forsa Konjunta Timor-Leste, lidera husi Autoridade Aduaneira (AA), halo apreensaun ba bebida asukarada marka KRATINGDAENG ho totál kaixa 50 no aimoruk herbal ne’ebé suspeita viola regra aduaneira, tanba la iha dokumentu importasaun legal atu tama mai Timor-Leste.

Apreensaun ne’e akontese iha operasaun auto-stop ka pasa-revista ba veíkulu transporte públiku no privadu, iha Rotunda Tibar, Aldeia Turleu, Suku Tibar, Postu Administrativu Bazartete, Munisípiu Liquiçá, iha Domingu (25/10), tuku 14:30 OTL. Operasaun ne’e nia objetivu atu prevene no kombate atividade kontra-bandu, no asegura kumprimentu ba lei no regulamentu aduaneiru iha Timor-Leste.

Lee Mós:
Callum Peterrs Dominante Délio Mouzinho Iha Eventu Internasional Primer Boxing Champions
ADVERTISEMENT
SCROLL FILA BA NOTISIA


Durante operasaun, ekipa Forsa Konjunta detekta bebida asukarada marka KRATINGDAENG ho totál kaixa 50, ne’ebé transporta uza kareta marka Mitsubishi Triton ho matríkula A.26.140 TL. Aleinde ne’e, ekipa mós detekta aimoruk herbal ne’ebé transporta uza kareta marka Cary ho matríkula C.12.048.

Merkadoria rua ne’e lori husi Munisípiu Bobonaro atu mai kapital Dili. Maibé, tuir informasaun kona-ba operasaun ne’e, aimoruk herbal la iha dokumentu importasaun legal atu tama mai Timor-Leste, nune’e autoridade sira suspeita katak sasán ne’e viola regra no prosedimentu aduaneiru.

Lee Mós:
Hasa’e Produsaun ho Teknologia : MAPPF Lansa Kuda Hare Modern iha Wedare Badak, Luca

Hafoin halo apreensaun, ekipa konjunta entrega evidénsia sira ba Komandu PNTL Munisípiu Liquiçá atu hala’o prosesu identifikasaun no prosedimentu legál. Kazu kona-ba bebida KRATINGDAENG kaixa 50 rejista ho númeru NUC 0096/26.LIZBT, enkuantu kazu aimoruk herbal rejista ho númeru NUC 0097/26.LIZBT.

Operasaun ne’e envolve instituisaun oioin, inklui Autoridade Aduaneira (AA), Diresaun Servisu Investigasaun Kriminál (DSIK), Diresaun Servisu Informasaun Polísia (DSIP) husi Polísia Nasionál Timor-Leste (PNTL), Polísia Sientífika Investigasaun Kriminál (PCIC), Servisu Nasionál Intelijénsia Estratéjiku (SNIE), membru D2 husi FALINTIL–Forsa Defeza Timor-Leste (F-FDTL) no S2 husi Unidade FALINTIL.

Lee Mós:
CCF Férias, Lere ho Apoiantes Adia Foti Kartaun Militante FRETILIN

Forsa Konjunta afirma katak,sei kontinua hametin koordenasaun no kolaborasaun entre instituisaun kompetente sira atu intensifika fiskalizasaun, prevene atividade kontra-bandu no asegura kumprimentu ba lei no regulamentu aduaneiru iha Timor-Leste.

Kazu ne’e sei tuir prosesu legál hodi permite autoridade kompetente sira halo investigasaun no foti desizaun tuir lei ne’ebé vigora iha Timor-Leste.(Smnews/)

Lee nain: 4