Smnewstl.com | Lautém,24 Outubru 2026-Komandu Polísia Munisípiu Lautém detén ona suspeitu na’in haat (4), ne’ebé deskonfia envolve iha kazu asaltu malu iha Aldeia Ouroma, Suku Kotamuto, Postu Administrativu Luro, Munisípiu Lautém. Insidente ne’e akontese iha loron 23 Outubru 2026, tuku 17:00 lokraik, no rezulta joven ida, naran Estimadu Silo, mate, enkuantu vítima na’in rua seluk hetan kanek.
Komandante PNTL Lautém, Superintendente Xefe Polísia António Rego Fernandes, esplika katak vítima sira mak Francisco, ne’ebé hetan kanek kmaan; Eusebio, ne’ebé hetan kanek todan; no Silo, ne’ebé hetan kanek grave to’o lalon vida.
Komandante ne’e haktuir ,Polísia uza ambulánsia atu lori vítima sira ba Hospitál Rejionál Eduardo Ximenes (HoREX), Baucau, hodi hetan tratamentu médiku. Maibé, vitima hakotu iis iha dalan ba ospitál, enkuantu Eusebio kontinua simu tratamentu médiku.
Relasiona ho matebian Silo nia mate, Servisu Investigasaun Kriminál (SIK), hamutuk ho Polísia Eskuadra Postu Luro, koordena ho família atu lori isin-mate ba Hospitál Nasionál Guido Valadares (HNGV) Dili, hodi halo ezame autopsia. Família konkorda ona atu halo ezame ne’e, no autoridade sira hein rezultadu médiku-legál atu determina kauza mate no parte isin ne’ebé hetan kanek.
Komandante António Rego Fernandes hateten katak,suspeitu na’in haat ne’e kaptura ona iha flagrante delitu no asegura iha sela detensaun atu kontinua prosesu investigasaun.
Antonio esplika kata, insidente ne’e hahú ho provokasaun entre individu sira, ne’ebé depois sai konflitu fíziku no rezulta asaltu malu to’o joven Silo lakon Vida.
Tuir Komandante KPM Lautém, kazu ne’e konsidera hanesan omisídiu agravadu no envolve arma branca, tanba suspeita katak,vítima hetan sona ho objetu kro’at. Maski nune’e, Polísia seidauk simu relatóriu kompletu kona-ba parte isin ne’ebé hetan sona.
“ Tuir informasaun ne’ebé ami hetan, vítima hetan sona. Tanba ne’e, ami konsidera kazu ne’e hanesan omisídiu agravadu no kazu arma branca,” António afirma.
Komandante PNTL Lautém ne’e subliña katak,autoridade sira sei hein rezultadu autopsia atu konfirma natureza kanek no kauza mate ho klaru.
Kazu ne’e entrega ona ba Servisu Investigasaun Kriminál (SIK),atu kontinua halo investigasaun, inklui rekolla evidénsia, klarifika kronolojia akontesimentu no determina responsabilidade kriminál husi ema sira ne’ebé envolve iha akontesimentu nee.
Polísia kontinua hala’o investigasaun,atu klarifika faktu hotu kona-ba kazu ne’e no asegura katak prosesu legál lao tuir lei.
Komentariu