18 Outubru, Delegasaun TL Liderado Manuel Vong Aranka Bá Dubai

Smnewstl.com 17-09-2021 (Dili) – Koordenadór Autoridade Nasionál Expo-Dubai, Manuel Lito Vong konfirma, ekipa delegasaun Timor-Leste nian ne’ebé xefia husi Ministru Koordenadór Assuntu Ekonómikus (MKAE), Joaquim Amaral, sei aranka bá Dubai iha loron 18 fulan Outubru tinan 2021 hodi partisipa iha enkontru business forum.

Manuel Vong hateten, loron 18 fulan Outubru tinan 2021, hanesan mós loron nasionál Timor-Leste nian, tanba ne’e ekipa delegasaun sei desloka bá Dubai, nune’e bele partisipa iha enkontru kona-ba business forum ho government summit iha ámbitu Expo-Dubai.

“Ministru Koordenadór Assuntu Ekonómikus mak hanesan xefe delegasaun, Ministru ne’ebé mak iha área selesionadu par atu halo duni promosaun branding, marketing ita-nia objetivu par atu bele halo promosaun Timor-Leste no mós atu bele dada kapta merkadu. Ita hein katak, dia nasionál Timor-Leste nian ne’ebé mak sei selebra iha dia 18 de outubru, delegasaun balun kal bá, par atu bele partisipa iha ita-nia business forum ho ita-nia government summit,” dehan Manuel Vong, iha MTKI Farol, Dili. Sesta ohin.

Membru governu ne’ebé sei partisipa mós iha Expo-Dubai mak hanesan, Ministru Turízmu Komérsiu no Indústria (MTKI) hanesan mós Prezidente Autoridade Nasionál Timor-Leste bá Expo-Dubai, Ministru Petróleu Minerais no Ministru Agrikultura no Peskas, nune’e ida-idak sei halo promosaun iha ida-idak nia área iha ámbitu Expo-Dabai.

“Ida-idak ho ninia pakote promosaun bá iha atrai investimentu estranjeiru nian, kapta merkadu signifika doméstiku bele liga ho merkadu internasionál, depois ita kapta mós investidores doméstiku no investidores internasionál estranjeiru, ita mós hakarak promove turízmu ou kapta turízmu par promove turízmu doméstiku no mós turízmu internasionál,” esplika nia.

Maski nune’e, Manuel Vong esklarese tan katak, área ha’at ne’ebé sei lori bá halo promosaun iha Expo-Dubai mak hanesan, turízmu ho ospitalidade, agrikultura no peskas, petróleu minerais no konektividade.

“Área ha’at mak ita sei lori bá. Konektividade ró kruzeiru mai beibeik, maibé ita-nia portu Dili sei transforma bá ita-nia portu turístiku, ita-nia ko’alia kona-ba ita-nia portu Tibar, tenki-ser halo promosaun par atu bele iha koneksoens entre área ásia pasífiku, ita hakarak ita-nia aerportu Dili, aerportu Baucau, aeroportu Suai par ita atu bá halo duni promosaun,” Tenik Vong.

Entretantu, grupu primeiru desloka ona bá Dubai hodi halo servisu iha pavilliaun Timor-Leste nian, inklui mós ekipa tékniku sira ne’ebé atu halo preparasaun bá enkontru bilaterál, forum bá negósu, no reprezentante husi Kámara Komérsiu Indústria Timor-Leste (CCI-TL).(ant)