10 Augostu, Governu Aprezenta Porposta OR Ba PN

Smnewstl.com – Primeiru-Ministru, Kay Rala Xanana Gusmão hateten, ezekutivu deside ona loron 10 fulan Augusto 2023, sei haruka proposta lei Orsamentu Retifikativu (OR) ba Parlamentu Nasional (PN) atu diskuti no aprova.

Xefe Ezekutivu hato’o lia hirak ne’e, hafoin hala’o enkontru semanal ho Prezidente Repúblika, José Ramos-Horta, hodi relata atividade governu nian, tanba konsellu ministru aprova ona lei orgánika IX Governu Konstitusional nian, ne’ebé sei submete ba Xefe Estadu atu promulga.

“Ne’e hanesan enkontru semanal mai atu relata ba Prezidente Repúblika katak, organigrama IX governu konstitusionál nian ami kompleta tiha ona, depois sei haruka mai Xefe Estadu atu promulga,”.

“Prezidente Repúblika, José Ramos Horta informadu ona, agora emprinsipiu to’o loron 10 Augostu governu sei haruka orsamentu reatifikativu ba Parlamentu Nasionál, membru governu hotu-hotu okupadu ho orsamentu retifikativu,” hatete Xefe Governu, Xanana Gusmão, iha Palásiu Prezidensiál. Kinta-feira (27/07/2023).

PM Xanana esplika, governu anterior nia orsamentu 2023 ne’ebé aprovadu iha PN hamutuk billiaun $ 2.1, tanba ne’e, IX Governu sei haree fila-fali prioridade saída mak atu implementa ho orsamentu refere hahú husi fulan jullu to’o 31 dezembru.

Maibé, governu mós sei haree no kurije irregularidade ba sistema finansas nian ne’ebé governu anterior muda, atu nune’e, ezekusaun sira bele la’o tuir regras no ho transparánsia.

“Prinsipiu orsamentu ne’e nia periódu anual hahú husi 1 Janeiru to’o 31 Dezembru, maibé ho mudansa ne’ebé iha buat sira ne’e la’o la tuir regras tan ne’e informa ona ba Xefe Estadu katak, hahú daudauk ona orsamentu reatifikativu atu haree saida mak governu bele gasta, saida mak labele gasta hodi retoma fila-fali lei transparánsia no responsablidade kona-ba osan povu nian,” sublña PM Xanana.

Entretantu, Xefe Ezekutivu afirma, IX Governu mós prepara aan atu prepara proposta lei Orsamentu Jerál Estadu 2024 nian, tuir prinsípiu orsamental orsamentu bazeia ba programa, nune’e labele gasta osan arbiru, tanba ne’e, osan povu nian.

Alende ne’e, PM Xanana haktuir, Prezidente Repúblika, José Ramos-Horta, husu governu atu servisu makas no labele ko’alia barak, nune’e bele lori bem estar ba povu.(*)