Xanana Seidauk Simu Alkatiri Nia ‘Surat Cinta’ 

Smnewstl.com 17-04-2022 (Dili) – Iha véspera eleisaun prezidensial, Sekretariu Jeral Fretilin haruka karta ida ba Prezidente CNRT Xanana Gusmão, atu halo refelesaun no balansu ba dezempeñu husi tinan 2002 to’o 2022.

Karta ne’ebé publika husi konta ofisial Facebook Mari Alkatiri, CC mos ba Prezidente Repúblika, Francisco Guterres Lú-olo, José Ramos Horta, Primeiru Ministru Taur Matan Ruak no Tenente Jeneral Reformadu, Lere Anan Timur.

Alkatiri hateten, la iha intensaun ruma, atu marka história foun, maibé konsiente ba diferensa husi líder nasional sira. “ita hatene mos katak, durante tinan 20, ita ida-idak, ativamente ka pasivamente husu atu halo intervensaun ba konstrusaun estadu no prosesu dezenvolvimentu polítiku, social, ekonómiku, finanseiru no mos definisaun kuadru jurídiku iha estadu direitu demokrátiku, planeamentu no programa ba governasaun” tenik Mari Alkatiri.
Sekretariu Jeral Fretilin mos reflete passajem iha krize, maibé kada lider atua ho ki’ik ka bo’ot, hodi ultrapassa krize ho susesu.

Tuir Mari, durante tinan 20 iha exijénsia barak no esperansa bo’ot, liu liu sidadaun marjinalizadu, faluk, oan ki’ak, idozu, joven ne’ebé hasoru problema oi-oin, maibé buka atu ultrapassa, hodi reklama direitu ba justisa, igualdade partisipasaun iha prosesu konstrusaun estadu no dezenvolvimentu.

Mari Alkatiri refere ba sidadaun hotu ne’ebe hakarak sente katak, sira mos parte ida husi rai no estadu ida ne’e, hodi kontribui ba estadu ne’ebé hanesan uma lisan ba ema hotu.

“realidade atual obriga hau atu defende pozisaun ida katak, to’o ona tempu atu halo reflesaun klean kona ba konstrusaun estadu no balansu dezempeñu ita ida-idak ka hotu ne’ebé assume lideransa iha tempu barak eh oituan ho rekursus favorável ou lae” hateten Sekjen Fretilin.

Ba Marí, balansu ne’e atu analiza objetivu, hetan konkluzaun ne’ebé los kona ba saida mak hakarak no kondisaun ne’ebé mak permite atu hetan dalan ne’ebé mak di’ak liu ba futuru ne’ebé ema hotu hein.

Líder ne’e husu disponibilidade husi Líder Nasional Xanana Gusmão, hodi hanoin kona ba nesesidade halo balansu no reflesaun hamutuk, hodi define kritériu selesaun, loron ka data atu konvida partisipante sira ne’ebé mai husi lideransa husi jerasaun oi-oin no konvidadu sira.

Maske nune’e, tuir informasaun ne’ebe Smnews asesu, karta ne’ebe publika ona iha konta ofisial Facebook Mari Alkatiri ne’e rasik  seidauk to’o iha Kay Rala Xanana Gusmao nia liman no seidauk komfirma klaru se’e los mak simu karta refere. (rio)