Xanana Iha Atoni Oan Nia Le’et, Husu Organiza Malu Kontribui ba Paz no Estabilidade

Smnewstl.com 14-09-2021 (Dili) – Maske la hola parte iha ezekutivu ruma, maibe figura Kay Rala Xanana Gusmão sai influensia bo’ot iha sosiedade hodi hetan fiar husi lidun ida ba lidun seluk partilha ba foinsa’e sira oinsa sai sidadaun responsavel ba a’an no nasaun.

Tersa-feira ohin, eis líder rezisténsia marka prezensa iha jogu futebol amigavel ne’ebe organiza husi atoni oan iha Dili hodi komemora proklmasaun independensia unilateral ba dala 46, iha Dom Bosco Comoro Dili.

Iha biban ne’e, Xanana Gusmão transmite ba atoni oan sira katak, liu husi jogu ne’ebe halao bele hametin lasu amizade entre foinsae li-liu Oecusse oan sira.

Xanana husu atu hatudu espíritu fair play jogu bonitu, nune’e bele kontribui ba ambiente páz no saudável.

“Inisiativa di’ak teb-tebes tanba, ita presiza tebes duni harii unidade iha ita-nia neon, ita-nia hahalok. Ne’eduni di’ak teb-tebes mais husi dok ita hotu la’o hela iha susar nia laran, ne’eduni desportu sai hanesan dalan ida meiu ida bá imi bele fó laran nafatin, tanba desportu hanorin katak, lakon ka manán hanesan de’it, importante mak bá partisipa, importante mak ita fó ho laran, ne’eduni ha’u louva teb-tebes,” dehan Xanana Gusmão iha kampu Dom Bosco Comoro.

Prezidente Komisaun Organizadora, Zeca Friado sublinha, objetivu husi jogu atoni cup ne’e mak atu komemora loron nasionál proklamasaun independénsia bá dala-46, hodi fó onra no dignifika erói sira-ne’ebé mate ona.

“Inisiativa loke jogu atoni cup ida-ne’e, atu komemora loron nasionál proklamasaun independénsia 28 novembru bá dala-46, objetivu ita komemora loron ida-ne’e liu husi troneu atoni cup, atu bele valoriza ka dignifika erói sira-ne’ebé fó sira-nia aan tomak bá luta libertasaun nasionál,” dehan Zeca Friado.

Hanesan jerasaun foun, Zeca konsiente katak, iha dever no responsabilidade moral atu bele kontribui bá páz no estabilidade nasionál.

Iha biban ne’e, Sekretáriu Jerál Federasaun Futeból Timor-Leste (FFTL), Nélio Isaac Sarmento louva inisiativa husi Movimentu Estudante Atoni Oan (METO) tamba konsidera importante tebes ba dezenvolve talentu foinsae sira nian.

“Inisiativa ne’e importante teb-tebes bá ita hotu-hotu iha ne’e, liu-liu bá ami federasoens futeból, tanba ami hetan komunikasaun husi organizasoens iha últimu ora depois mak ami bele kontribui oituan,” dehan Nélio Isaac.

Jogu ne’e rasik hala’o iha kampu futeból Dom Bosco Comoro, no partisipa husi Clubu hamutuk 23, maioria mesak Oe-cusse oan iha Dili hanesan estudante inklui sira seluk ne’ebe buka moris.

Jogu refere hetan apoiu fundu balun husi Autoridade Rejiaun Administrativa Espesiál Oe-cusse Ambenu (RAEOA), no apoiu tékniku husi FFTL no seluk tan.(ant)