Smnewstl.com – Primeiru-Ministru (PM), Kay Rala Xanana Gusmão atualiza progresu servisu IX Governu Konstitusionál nian bá Prezidente Repúblika (PR), José Ramos-Horta liu-hosi reuniaun semanál iha Palásiu Prezidensiál, Bairru-Pité, kinta (05/12/2024).
“Atualiza bá Prezidente kona-bá servisu ne’ebé Governu hala’o ona no servisu sira seluk ne’ebé sei kontinua halo iha tinan-oin tanba tinan oin mak tinan atu servisu,” PM Xanana haktuir.
Ligadu ho adezaun TL nian bá Association of Southeast Asian Nations (ASEAN), Xefe Governu dehan, liu-hosi Reuniaun Konsellu Ministru atualiza ona progresu sira tanba atu sai membru plenu tenke kumpri kritériu sira ne’ebé atribui, balun kumpri ona to’o 70%, balun seidauk to’o 40%, maibé enjerál 50%.
Tanba ne’e, liuhosi reuniaun Konsellu Ministru husu bá ministériu sira ne’ebé tenke hamutuk ho Ministériu Negósiu Estranjeiru hodi bele aselera buat sira ne’ebé bele halo, nune’e Malázia bele simu Timor-Leste sai membru plenu ASEAN iha kedan inisiu tinan 2025.
PM Xanana garante mós katak, Orsamentu Jerál Estadu (OJE) tinan 2025 sei benefisia povu maske benefísiu ne’e la diretamente maibé liu-hosi konstrusaun eskola ida ka sentru saúde ruma ne’e bá duni povu.
“Ha’u dehan ona bá Prezidente no Parlamentu katak kada trimestre ha’u sei la’o hale’u munisípiu hodi haree programa sira ne’ebé kada ministériu tau iha orsamentu. Tenke halo no kualidade, atu dehan nafatin katak tinan 2024 ami haree irregularidade barak ne’ebé iha hodi kurije liu-liu iha sistema finanseiru, tinan 2025 sei sai tinan implementasaun, saida mak ami tau iha programa ami sei implementa,” Xanana Gusmão garante.
Governu mós kontinua suspende atividade Grupu Arte Marsiál (GAM) no Grupu Arte Rituál (GAR) tanba ho suspensaun ne’e maka joven sira hatudu duni sira-nia amizade. Realidade hatudu mós katak, grupu sira ne’e realiza eventu konsertu muzikál ne’ebé ho prezensa joven barak, maibé la mosu problema ruma. (*/Smnews)
Komentariu