UNTL Sai Vensedor Iha Kompetisaun Koral Funsaun Publika 2024

Smnewstl.com – Grupu korál Universidade Nasionál Timor Lorosa’e (UNTL), sai hanesan manán-na’in primeiru lugár bá kompetisaun korál iha ámbitu komemorasaun Loron Funsaun Públika tinan 2024 ne’ebé organiza hosi Ministériu Asuntu Kombatente Libertasaun Nasionál (MCLAN sígla portugés).

Kompetisaun ne’ebé hala’o iha Salaun Três de Março Maubai (Eis edifísiu Arte Moris), Comoro, partisipa hosi grupu 17 mai hosi instituisaun estatál sira no grupu neen mak konsege hakat bá faze finál, iha tersa (02/07/2024).

Ema na’in-tolu mak sai juri iha kompetisaun korál ne’e mak hanesan, Padre Adérito da Costa, SDB, Madre Inês Gomes FdCC no Frei Joel Casimiro da Costa Pinto, OFM ne’ebé halo selesaun finál bá grupu korál ne’e no vensedór dahuluk maka UNTL, daruak Ministériu Finansas (MF), datoluk Ministériu Planeamentu Investimentu no Estratéjiku (MPIE), dahaat Sekretaria Estadu Arte no Kultura (SEAK), da-limak Ministériu Edukasaun (ME) no da-neen maka Gabinete Primeiru-Ministru (GPM).

Frei Joel Casimiro da Costa Pinto, OFM esplika, selesaun bá kompetisaun finál ne’e rigorozu tebes tanba juri la haree de’it bá kanta di’ak maibé avalia mós buat barak, nune’e ekipa juri agradese bá hotu-hotu no hato’o parabens bá sira ne’ebé hananu di’ak, sira ne’ebé presiza hadi’a tékniku tanba kompetisaun ne’e halibur partisipante sira hodi fó ksolok bá malu.

Madre Inês Gomes FdCC mós parabeniza grupu sira tanba hotu-hotu esforsu-an, hodi prodús lian ne’ebé furak maski balun di’ak no balun seidauk másima, maibé hotu-hotu iha esperansa tanba bele hetan oportunidade ida-ne’e atu aprende di’ak liu-tán.

Nune’e mós Padre Adérito da Costa, SDB hato’o pedidu bá Primeiru Ministru (PM), Xanana Gusmão ne’ebé asiste direta kompetisaun finál ne’e katak, Governu presiza realiza kompetisaun korál nasionál ida iha jináziu Dili nune’e ema hotu-hotu bele kompete.

“Hanesan juri haksolok tebes tanba depois de estuda múzika tinan barak nia laran ha’u haree katak Timor ne’e bele halo buat bo’ot di’ak. Ami hahú treina kiik-koan sira bá instrumentu, iha orkestra nian atan ha’u halo esforsu atu espalla iha koru sira Timor tomak. Ha’u-nia sujestaun bá hotu-hotu maka oinsá bele halo koru ho númeru ne’ebé bo’ot ho instrimentu barak bá kanta iha Jináziu Dili, hatudu katak ita mós bele halo buat ruma ho hananu sira bele hato’o fila-fali bá jerasaun foun sira,” Padre Adérito da Costa, SDB hateten.

Tuir Padre Adérito katak, iha baze lakon sentidu bá ida-ne’e no nia ho ekipa sei esforsu atu implementa buat sira ne’e maibé susar, tanba ne’e maka sei koko nafatin atu oinsá kuda iha jerasaun foun sira-nia laran.

Iha fatin hanesan, Primeiru-Ministru, Kay Rala Xanana Gusmão fó apresiasaun bá komisaun organizadora hosi MCLAN ne’ebé iha inisiativa hodi realiza kompetisaun korál ne’ebé kapás tebetebes no husu atu kompetisaun sira hanesan ne’e bele realiza mós bá labarik ki’ik sira.

“Ida-ne’e tau ona iha ha’u-nia ulun to’o tinan ne’e nia rohan ita buka daudaun komisaun organizadora. Ha’u haree ona sé mak organiza di’ak-liu, ida maka Ministru Gil Oan Soru. Ne’e duni, ha’u agradese tebes bá juri ne’ebé halo servisu didi’ak. Hosi atividade sira ne’e mak ita haree dadaun ona grupu korál sira,” Primeiru-Ministru hateten.

Antes ne’e Primeiru-Ministru hanoin ona atu loke eskola múzika hodi prepara kiik koan sira iha área múzika tanba foin-sa’e timoroan sira iha vontade boot bá ida-ne’e.

“Uluk kedan hanoin ona iha ha’u-nia subar-fatin Kakaulidun, ha’u ko’alia ho ita-nia maestro atu halo eskola múzika nune’e ita forma daudaun orkestra tanba ita iha vontade bá ida-ne’e,” Xanana Gusmão hateten.

Xanana observa katak, Domingu bainhira bá misa iha Igreja Balide sempre akompaña labarik sira kanta iha koru ho lian furak tebetebes, presiza promove no dezenvolve.

Xefe Ezekitivu ne’e informa, tinan ne’e seidauk bele realiza kompetisaun korál nasionál tanba Governu okupadu hela ho preparasaun simu vizita Sua Santidade Papa Francisco no komemorasaun anivsersáriu tinan-25 Referendum, maibé sei bele realiza iha tinan 2025.

Tanba ne’e, líder nasionál ne’e husik hela lia-menon ida katak, sira ne’ebé manán la’ós atu sai di’ak-liu iha mundu, nune’e enkoraza grupu korál hotu-hotu atu kontinua aprende liu liu Hino Nasionál tenke hatene didi’ak no mós Hino Funsaun Públiku.

Ministru Asuntu Kombatente Libertasaun Nasionál, Gil da Costa Monteiro “Oan Soru” nu’udár prezidente komisaun organizadora agradese bá grupu korál sira ne’ebé partisipa ona iha kompetisaun ne’e no konvida manán na’in-sira atu bá simu prémiu iha 15 fulan Jullu iha komemorasaun loron funsaun públika ne’ebé sei hala’o iha munisípiu Ainaro. (*/Smnews)