Smnewstl.com (São Tomé e Príncipe) – Ministru Negósius Estranjeirus no Kooperasaun, Bendito dos Santos Freitas hala’o enkontru bilateral ho nia omólogu Ministru Negósius Estranjeirus Portugal, Paulo Rangel, hodi ko’alia kona-ba difikuldade ne’ebé Timoroan sira hasoru iha aeroportu Bali no Dubai bainhira halo viajén utiliza passaporte Timor nian.
Sorumutuk entre Ministru Negósius Estranjeirus Timor-Leste ho Portugal ne’e hala’o, hafoin partisipa iha reuniaun ordinaria Konsellu Ministru CPLP ba dala XXIX iha São Tomé e Príncipe.
Problema ne’ebé Timoroan sira hasoru iha aeroportu Bali no Dubai mak, parte imigrasaun husu atu taka viza bainhira viajén ba Portugal, tanba simu orientasaun husi Polísia Seguransa Públika (PSP) Portugal nian.
Ministru Bendito Freitas hateten, Timoroan sira bele halo viajén husi Dili ba Lisboa Portual la presiza taka viza, tanba iha ona akordu mobilidade Comunidade dos Países da Língua Portuguesa (CPLP) ho nasaun membru sira.
“Elementu ikus mak sai preokupasaun ita hotu nian agora mak kona-ba, sidadaun Timor-Leste ne’ebé lori passaporte mai hetan difikuldade iha aeroportu iha Dubai, iha Bali. Ohin ha’u afirma ho omólogu Ministru Negósius Estranjeirus Portugal, Paulo Rangel atu haree ida-ne’e, Ministru mós promete kedas katak, nia to’o Lisboa sei kontaktu kedas departamentu relevantes PSP (Polísia Seguransa Públika-PSP) atu bele haree kona-ba situasaun ida-ne’e, depois sei informa fila-fali mai ita. Ita ho CPLP ne’e ita iha akordu mobilidade ida liu tha ona loloos ne’e laiha problema, Ministru sei ko’alia ho sira-nia instituisaun relevante atu haree kona-ba ne’e,” informa Ministru Bendito.
Ministru Bendito klarifika, lei foun ne’ebé Governu Portugal foin aprova ne’e laiha relasaun ho situasaun Timor-Leste, maibé ne’e, lei refere nu’udar assuntu interese nasionál Portugal nian hodi kontrola imigrante sira.
Alende ne’e, durante enkontru, ko’alia mós kona-ba Programa Estratéjika Kooperasaun, inklui hato’o intensaun Timor-Leste nian atu bele sai prezidénsia rotative ba CPLP iha futuru.
Iha biban ne’e mós, Ministru Negósius Estranjeirus no Kooperasaun, Bendito Freitas, hala’o mós enkontru bilateral ho nia omólogu Ministru Negósius Estranjeirus Repúblika Federativa Brazil, Mauro Vieira, hodi ko’alia kona-ba futuru kooperasaun ne’ebé Brazil hakarak fó ba Timor-Leste.
“Depois de enkontru ida-ne’e, Timor-Leste mós iha enkontru ho ekipa Brazil ne’ebé konfirma teb-tebes sira hakarak hato’o nafatin kooperasaun hanesan uluk nian, liu-liu ba kuádrus dezenvolvimentu professional, hanesan SENAI Becora, sira hakarak halo tan sira-nia apoiu ka subsídiu intervensaun iha ne’ebá,” tenik Ministru Bendito.
Oras ne’e dadauk, Repúblika Federativa Brazil, oferese hela projetu kona-ba kapasitasaun rekursu umanu liu husi administrasaun públika, tanba ne’e, husu atu extende tan projetu refere ba iha área edukasaun nian, nune’e bele hasa’e liután kapasidade professor sira-nian.
“Embaixadór Rui Perreira ne’ebé husi Ajénsia Brazileira Kooperasaun (ABC) konfirma ona katak, Brazil destaka 15 professores ba Timor, no kontinuadamente sira sei haree situasaun par atu eleva tan kooperasaun entre Timor-Leste ho Brazil,” katak nia.
Alende ne’e, Ministru Bendito Freitas mós hala’o enkontru bilateral ho omólogu Ministru Relasaun Externa Angola, Téte António, hodi ko’alia kona-ba ajenda vizita Prezidente Repúblika Angola, João Lourenço ba Timor-Leste.
Ministru Bendito dehan, Prezidente Repúblika Angola, João Lourenço konfirmadu sei halo vizita ofisiál ba Timor-Leste iha tinan oin 2025. (*/Smnews)
Komentariu