Smnewstl.com—Ministru Petróleu no Rekursus Minerais, Francisco da Costa Monteiro destaka nesesidade atu Gás Naturál Liquifeitu – GNL ba seguransa enerjétika, assesibilidade no estabilidade iha merkadu, maske mundu avansa hela ho tranzisaun enerjétika.
Prespetiva ne’e hato’o sessaun interministerial kona-ba Konferénsia Produtór-Konsumidór Gás Naturál Liquifeitu – GNL iha Tókiu, Japaun ne’ebé organiza husi Ministériu Ekonomia, Komérsiu no Indústria.
Ba Ministru Francisco Monteiro, kontratu ba Gás Naturál Liquifeitu – GNL ba tempu naruk mak sei fó serteza nesesária ba dezenvolvimentu upstream no downstream iha nasaun emerjente sira, tanba kontratu investimentu tempu badak ne’ebé dadaun ne’e sai destake mundiál, iha tendénsia estraga investimentu ba projetu infraestruturas ba tempu naruk.
Membru governu ne’e mos aprezenta Timor-Leste nia ambisaun atu dezenvolve kampu Greater Sunrise ne’ebé hanesan mos prioridade nasionál, hodi bele produz gás dahuluk iha tinan 2032 no mos dezenvolve rekursus potensiál seluk hanesan kampu Chudich no Kelp Deep.
Ba finalidade ne’e, Timor-Leste hakarak dezenvolve downstream ne’ebé inklui dezenvolvimentu GNL (Gás Naturál Liquifeitu), komplexu petrokímiku no instalasaun refinaria iha Kosta Súl, hodi la’os de’it monetiza rekursu naturál, maibé kria kampu servisu, diversifika ekonomia no fornese valór sósiu-ekonómiku iha Projetu Tasi Mane.
Bazeia ba rezultadu estudu selesaun konseitu husi Wood Group, konfirma katak, gazodutu ba Timor-Leste no Planta Gás Naturál Liquifeitu iha onshore hanean opsaun ne’ebé teknikamente no komersialmente viável kuy ba Greater Sunrise.
Ba futuru, Ministru Francisco Monteiro tenik katak, Timor-Leste prontu atu koolabora ho produtór, konsumidór. Finanseitu no investidór atu garante Gás Naturál Liquifeitu – GNL, kontinua sai papél sentrál iha tranzisaun enerjetika global.(*/Smnews)
Komentariu