Smnewstl.com 23-12-21 (Dili) – Prezidente Komissaun Nasionál Eleisõens (CNE), José Agostinho da Costa Belo Perreira ho estrutura tomak CNE hasoru malu ho Primeiru-Ministru (PM), Taur Matan Ruak hodi atualiza prosessu preparasaun CNE nian hasoru eleisaun prezidensiál iha tinan 2022.
Durante enkontru, Prezidente CNE ho ekipa hato’o mós difikuldade ne’ebé sira liu-liu iha área transporte nian hodi ajuda sira atu hala’o servisu, tanba Janeiru 2022 Prezidente Repúbliku dekreta ona kalendáriu bá eleisaun prezidensiál nian.
Nia hatutan, bainhira hakarak prosesu eleisaun ne’e la’o ho di’ak no fó satisfasaun bá ema hotu, liu-liu kandidatu sira, maka prosesu resenseamentu eleitrál no seluk tan tenki la’o di’ak.
“Preparasaun bá eleisaun tuir síklu eleitorál ne’e agora Dezembru ne’e ita hotu ona, kuandu tama Janeiru Prezidente fó sai ona data eleisaun, entaun tama ona bá eleisaun ninian, tanba ne’e mak ami mai update hela kona-ba prosesu tomak ne’ebé órgaun eleitorál CNE nia supervizaun bá aktus hotu-hotu, ita hakarak eleisaun ne’e di’ak, prosesu ne’e tenki di’ak, resenseamentu tenki di’ak, dadus tenki komprovativu,” dehan Prezidente CNE, José Belo hafoin audiénsia ho PM Taur iha Farol, Dili, Kinta ne’e.
Tuir previzaun CNE nian, kalendáriu bá eleisaun prezidensiál sei akontese iha fulan Marsu tinan 2022.
Tan ne’e, órgaun supervizaun bá aktus eleitorál ne’e, presiza hetan apoiu lojístika, transporte no seluk tan, nune’e, iha tempu ne’e bele transporta ekipamentu eleisaun nian bá área rural.
“Ida fali ami ko’alia mós kona-ba eleisaun ne’e previzaun sei monu iha Marsu, entaun tempu udan, ami husu mós apoiu oinsá fasilidade mós órgaun eleitorál sira, atu nune’e sira bele hala’o sira-nia atividade ho di’ak, liu-liu aspetu transporte sira-ne’ebé ita bele utiliza másimu, balun ne’ebé CNE iha, maibé, ami mós husu apoiu fatin balun bele ajuda, atu nune’e par bele la’o di’ak,” dehan nia.
Iha biban ne’e José Belo husu Xefe Governu nu’udar mós líder nasionál no eis guerilleiru, atu apoiu CNE, nune’e, CNE bele ezérse funsaun ho responsabilidade, transparánsia no neutralidade atu evita atu akontese fraude eleitorál.
Tanba nia hatutan, kampaña eleisaun ne’ebé sei akontese iha 2022 ho 2023 ne’e, la’ós de’it invole joven sira, maibé sei involve mós líder eis guerilleiru sira 1975 nian.(ant)
Komentariu