Smnewstl.com 13-09-2021 (Dili) — Tersa-feira aban (14/09/21) mais ou menos tuku 9 ho balun Komandu Polísia Munisípiu Dili liu husi Polísia Tránzitu sei halo destroisaun bá kapasete ne’ebé la standard hamutuk 100-resin iha tibar.
Komandante Polísia Tránzitu Nasionál, Inspetór Xefe Domingos Sarmento da Gama informa, Komandu Polísia Munisípiu liu husi Polísia Tránzitu Nasionál, simu ona despaixu husi Komandante Jerál Polísia Nasionál Timor-Leste (PNTL), Komisáriu Faustino da Costa hodi halo destroisaun bá kapasete hirak ne’e.
Kapasete hirak ne’e, prende husi utilizadór motorizada sira-ne’ebé la tuir standard no lei ne’ebé iha.
“Kapasete ne’ebé mak la tuir standard durante ita prende 100 itál kapasetes, ne’ebé agora dadauk ita halo hela despaixu, ohin komandu halo ona orden iha ona despaixu, pelo menos aban ita bele halo destroisaun bá kapasete hirak ne’e, tanba 100 itál kapasetes ne’e ita rai hela kleur liu ona okupa fatin no kapasete ne’e mós la uza,” dehan Inspetór Xefe Domingos Gama iha servisu fatin Komandu Polísia Munisípiu Dili, Segunda ohin.
Inspector Domingos Gama esplika, kapasete ne’ebé tuir standard loloos mak, kapasete ne’ebé taka tomak ita-nia ulun, nune’e bainhira mosu asidente ruma bele salva ita-nia vida.
“Kapasete sira tuir standard ne’e mak hanesan ita-nia nasaun viziñu indonézia nian karik, iha lolon hakerek SNI (Standard Nasional Indonesia), kapasete ne’e uza par intensaun salva ita-nia vida, maioria involve iha asidente ema barak fatal ema mate ne’e, tanba maior parte gráve iha parte ulun, kapasete hanesan ema servisu kompañia nian ou hanesan sapeo doku de’it iha ulun ne’e involve iha asidente ruma, ita la konsege salva vida,” afirma nia.
Maski nune’e, komandante polísia tránzitu nasionál ne’e subliña, atu halo destroisaun bá kapasete hirak ne’e, la presiza hetan despaixu ruma husi ministériu públiku, tanba ne’e la’ós objetu de krime.
Tanba ne’e, hato’o de’it pedidu bá komandu PNTL, nune’e bele hetan autorizasaun atu halo destroisaun.
Maibé Inspetór Xefe Domingos Gama mós husu ministériu kompetente sira, atu kontrola negosiantes ne’ebé fa’an sasán la tuir lei inklui kapasete ne’ebé la standard, nune’e labele tau sidadaun sira-nia vida iha rísku.(ant)
Komentariu