Smnewstl.com | DILI, 06 Abril 2026 – Kazu tentativa omesídiu agravadu ho arma branka akontese iha Aldeia Naroman, Suku Madohi, Posto Administrativu Dom Aleixo, tuku 15:59 OTL, rezulta vítima na’in haat (4), inklui ema ida ne’ebé mate kedas iha fatin no ema tolu seluk hetan kanek todan.
Tuir informasaun ofisiál, vítima sira inklui:
Labarik mane ida ne’ebé mate kedas iha fatin ho naran kumpletu Reinaldy dos Santos (7), Feto minor ida hetan kanek todan iha kotuk laran, Jovem ida ho idade 19 anos hetan kanek iha kotuk laran, Katuas ida ne’ebé tenta hadau tudik husi suspeitu, mos hetan kanek.
Suspeitu, ho identidade FXC husi Oecusse, uza tudik rua (2) hodi halo asaun ne’e.
Kronolojia Badak
Tuir deklarasaun husi testemuña ne’ebe Smnews asesu iha tereno komfirma, suspeitu hahú asaun violénsia husi sona nia família rasik, inklui nia subrinha no nia maun.
Hafoin ne’e, suspeitu halai ba estrada iha bairo no ataka vítima seluk, inklui Reinaldy do Santos, ne’ebé mate kedas hafoin hetan sona iha kakorok bainhira sae bisikleta.
Testemuña tenta hadau arma husi suspeitu, maibé la konsege, no suspeitu kontinua sona vítima seluk to’o hamosu kanek todan iha ema na’in tolu.
Membru PNTL, hamutuk ho komunidade lokal, halo intervensaun imediatu hodi prende suspeitu iha fatin, ho tudik rua (2) nudar arma krime hafoin transporta ba Esquadra Dom Aleixo atu halo investigasaun
Vítima na’in tolu hela iha tratamentu intensivu iha Klinik Kampung Baru. Isin mate vítima lori ona ba mortuario Hospital Nacional Guido Valadares Dili, hodi submete ba prosesu autopsia.
Tuir informasaun preliminár, suspeitu suspeita iha problema saúde mental.
Autoridade kompetente sei kontinua halo investigasaun atu apura motivu no sirkunstánsia kompletu ba kazu ne’e.
SMNEWS TIMOR kontinua akompaña dezenvolvimentu kazu ida ne’e.(/SMnews)
Komentariu