Smnewstl.com | DÍLI, 1 Abril 2026 – Joven ida sofre kanek grave iha kakorok ho tudik hafoin halai tama ba Quartel General F-FDTL iha área Fatuhada, Dili, hodi buka seguransa no tulun mediku.
Insidente ne’e akontese iha tuku 15:40 lokraik.
Tuir informasaun husi komunidade sira ne’ebé hela no servisu besik fatin akontesimentu, haree vitima halai husi área Komoro ho kondisaun kakorok nakfera, antes tama ba Quartel General F-FDTL.
Situasaun ne’e halo komunidade no traballadór sira iha loja besik fatin akontesimentu sai hakfodak no paniku.
Membru sira husi FALINTIL-FDTL iha Quartel General responde lalais, fornese tulun dahuluk no organiza evakuasaun vítima liu husi ambulánsia ba Hospital Nacional Guido Valadares hodi hetan tratamentu mediku urjente.
To’o agora, seidauk iha informasaun ofisiál kona-ba identidade vítima nian. Fontes hatete katak kanek ne’e grave loos, maibe seidauk klaru se vítima hetan atake husi ema seluk ka sona nia-an rasik.
Autoridade kompetente sira agora daudaun sei halo investigasaun hodi apura faktu no determina motivu husi insidente ne’e. (/SMnews)
Komentariu