Smnewstl.com 07-09-2021 (Dili) — Komandu Jerál Polísia Nasionál Timor-Leste (PNTL) lakon tan membru di’ak ida Inspetór Jerál, Mauklau Amaral Magno iha Ospitál Naisonál Guidu Valadares (HNGV).
Matebian hakotu iis iha HNGV Tersa-feira ohin, tanba sofre moras, no tuir informasaun ne’ebé iha mate ho Covid-19.
Porta-voz Komandu Jerál PNTL, Superintendente Xefe Arnaldo de Araújo, lori Komandu Jerál PNTL nia naran, hato’o sentidu kondolénsia profunda bá família enlutada, tanba lakon ema di’ak ida iha sira-nia le’et.
“Hakarak hato’o ami-nia sentidu kondolénsia kle’an tebes bá família Matebian Inspetór Xefe, Mauklau Amaral Magno ne’ebé hodi kalan hakotu iis iha Hospitál Guidu Valadares, nia mate tanba moras, agora daduak atu transporta l bá iha nia moris iha Bauca.
Lori Komandu PNTL nia naran hakarak hato’o sentidu kondolénsia profunda bá família enlutada,” dehan Porta-voz PNTL, Superintendente Xefe Arnaldo de Araújo, iha komferénsia imprensa Tersa ohin iha Komandu jerál PNTL.
Superintendente Xefe Arnaldo de Araújo hateten, inspetór Mauklau Amaral Magno, nu’udar ofisiál ida-ne’ebé badinas no disiplina tebes iha oras servisu nian.
Tanba ne’e Arnaldo de Araújo esplika, tuir lei no prosedimentu PNTL nian, bainhira membru ida mate, instituisaun sempre trata nia direitu, tanba ne’e husu parte família atu kolabora ho PNTL hodi bele trata matebian nia direitu.
“Nia ofisiál ida ké di’ak, buat hotu ita-nia distinu ita lahatene, iha Maromak nia liman, kuandu ita bele servisu di’ak ga servisu aat mós, kuandu to’o tempu ita mate ita bá ona, ita hotu hatene katak, bainhira membru sira ida mate, hanesan baibain komandu sei haree nia direitu depois família sira tenki-ser mai trata nia direitu tuir regras no prosedimentu ne’ebé mak PNTL iha,” subliña nia.
Inspetór Polísia Mauklau Amaral Magno hahú tama Polísia iha tinan 2001 ida, durante ne’e matebian hala’o knár hanesan Komandante Polísia Eskuádra Postu Administrativu Venilale Munisípiu Baucau.
Depois Komandu jerál PNTL, muda fali matebian mai iha postu administrativu Vera Kruz Munisípiu Dili hanesan Komandante Eskuádra, no ikus liu Mauklau Amaral Magno hala’o knár iha Inspesaun Jerál iha Komandu Jerál PNTL.
Matebian mate ho idade tinan 50 resin, no matebian sei lori bá halot iha rai moris fatin iha Postu Administrativu Venilale Munisípiu Baucau.(ant)
Komentariu