Smnewstl.com 05-10-2021 (Dili) – Organizasaun sosiedade sivil husi Fundasaun Mahein liu husi sira-nia peskiza identifika katak, Orsamentu Jerál Estadu (OJE) kada tinan Parlamentu Nasionál aprova, governu ladún tau atensaun másimu bá Unidade Polísia Marítima (UPM) ho komponente naval hodi halo kontrolu iha tasi.
Peskiza Fundasaun Mahein, Sancho Xavier hateten, durante ne’e, fundasaun mahein haree katak, difikuldade ne’ebé aparellu estadu rua UPM ho forsa no komponente naval sira hasoru mak menus rekursu umanu ho ekipamentu hanesan ró no seluk tan atu halo operasaun iha tasi.
Peskizador ne’e hatutan, tasi Timor-Leste nia luan liu rai maran, maibé ezekutivu ladún investe iha tasi, maske tasi maka kontribui retornu makas bá OJE ne’ebé kada tinan governu foti hodi halo finansia mákina estadu liu husi fundu petrolíferu.
“Durante ne’e ladún la’o tanba, buat ne’ebé ami identifika mak difikuldade iha rekursu no meius atu bele halo operasaun nian. Ha’u laiha klasifikasaun kona-ba orsamentu, maibé, buat ne’ebé durante ne’e ami identifika maka, seidauk iha atensaun di’ak bá ida-ne’e, lahatene tanba iha nesessidade seluk ne’ebé polísia sira, forsa sira sei presiza,” dehan Peskizadór, Sancho Xavier, iha nia knar fatin Fundasaun Mahein Paulos VI Dili. Tersa ohin.
Peskizador ne’e hatutan, durante ne’e, atividade peska illegal naok ikan iha tasi laran kuaze rihun 25, tanba ne’e falta kontrolu husi Polísia Nasionál Timor-Leste (PNTL) liu-liu UPM no mós FALINTIL Forsa Defeza Timor-Leste (F-FDTL) liu husi komponente naval.
“Kada tinan ita lakon 250 mill bá leten ita lakon ikan bá peska illegal sira, ema naok ita-nia ikan kada tinan ne’e tanba falta kontrolu iha área tasi nian liu-liu oinsá atu halo patrullamentu regular ou patrullamentu konjunta entre unidade polísia maritima no F-FDTL komponente naval nian,” tenik nia.
Maske nune’e nia reforsa tan, orsamentu sira atu finansia dezenvolvimentu Timor-Leste dependénsia makas de’it bá OJE, liu husi reseitas fundu petrolíferu.
Nia husu governu atu investe ona PNTL ho F-FDTL, liu-liu iha área rekursu umanu ho ekipamentu sira, nune’e sira bele halo kontrolu másimu iha territóriu nasionál.(ant)
Komentariu